Willemstad——Lider politiko di Trabou pa Kòrsou Sr. Rennox Calmes a entregá ayera na parlamento un proposishon di ahuste di lei. Ta trata di ahuste di lei den Kòrsou su Areglo di Estado pa evitá matrimonio di mésun sexo.

Tabata dia 6 di desèmber di aña pasá ku korte a dikta sentensia ku matrimonio di mésun sexo por tuma luga na Aruba i Kòrsou. Korte a motiva ku esaki por, debi ku artikulo 30 i 33 di kódigo sivil di Kòrsou ta den deskriminashon ku artikulo 3 i 12 di Kòrsou su Areglo di Estado.

Trabou pa Kòrsou ta di opinión ku korte a bai sinta riba stul di parlamento i ku riba algu fundamental, asina aki korte no ta esun ku ta disidí. Pueblo di Kòrsou no a duna indikashon pa medio di nada ku pueblo ta di akuerdo pa asepta matrimonio di mésun sexo. 

Gobièrnu a bai korte di kasashon kontra e desishon di korte. Esaki ta un desishon ku Trabou pa Kòrsou ta sostené.  Pero pa yuda mas ainda i pa kumpli ku su deber di parlamentario, Sr. Rennox Calmes a entregá e ahuste di lei aki. Debi ku ta trata di un ahuste di lei den Kòrsou su konstitushón, mester di 2 tersera parti pa vota pro. Pues 14 voto.

Ku tin buraku den nos leinan, ta parlamentario mester sòru sera nan.