Minister Cijntje tabata den parlamento ayera pa deliberá riba e situashon aktual di Damen.

Willemstad,– Ayera tardi parlamento di Kòrsou a tene un reunion públiko kaminda a deliberá ku e minister di Desaroyo Ekonómiko Ruisandro Cijntje i tambe ku representantenan di Damen Shiprepair Curacao i Gerensia di C.D.M. Holding N.V. Sr. Getmar Caldera.

E deliberashon tabata tokante di e último desaroyonan na Damen Shiprepair Curacao.

Parlamentario Maria Nita a pidi minister pa parlamento haña dokumentonan di akuerdo ku tin ku Damen, pero minister a pidi dos minüt pa papia ku Damen i C.D.M. Holding pa wak si esaki no tin ningun konsekuensia.

Parlamentario Carolina a pidi pa haña relato finansiero di e dos kompanianan di for di 2017 pa 2022. Minister a bini bek i a splika ku lo mester bai wak si lo por entrega esakinan, paso no por saka e sifranan di e kompanianan riba kaya.

E relatonan anual lo bai fasilitá esakinan na parlamento i te ku 2019 esakinan ta ouditá i lo manda nan pa ministerio di fiansa pa nan tambe wak esakinan promé.