WILLEMSTAD—–Riba djamars, 28 di mart, a tuma un reunion entre Minister di Finansa i algun di e grupo di interes di online gaming. Minister ta reuní regularmente ku e sektor aki.

Puntonan di agènda a inkluí susesonan rondó di ICE, intenshon pa lanta un grupo di trabou pa organisá un konferensia òf ekshibishon di online gaming na Kòrsou, prolongashon di lisensia di esnan ku tin un lisensia kaba, e konseho di SER riba e Landsverordening op de Kansspelen. Tambe Minister di Finansa a informá e sektor di su intenshon di duna un diskurso prinsipal na I-Gaming Next na Malta, den yüni di e aña aki. Durante e reunion, minister di finansa a hasi un petishon na e grupo di interes pa na organisá nan mes i forma un opinion konhunto.

Por último minister a informá e sektor di su intenshon pa kada 6 siman reuní ku e sektor. Esaki lo sosodé riba un base di rotashon, kual ta nifiká ku kada 6 siman lo invitá otro gruponan di interes pa e reunionnan binidero di moda ku mas tantu grupo di interes ta haña oportunidat pa duna nan kontribushon. Grupo di interes ta inkluí tambe e asina yama ‘operators’. E operators ta e partidonan ku de echo ta duna oportunidat pa partisipá na weganan di hazard online.