Parlamentario Ana Maria Pauletta di PAR a hasi e pregunta ku si a bira lomba pa GVI.

WILLEMSTAD – Minister di Hustisia Shalten Hato riba petishon di Parlamentario Steven Martina di frakshon di MAN, tabata ayera den sala di Parlamento pa un enkuentro públiko pa trata entre otro e ‘Situashon di Stichting Gezinsvoogdij’ (GVI). E reunion a kuminsá 11’or manera planiá i manera e nòmber ‘vragenuur’ (ora di pregunta) mes ta bisa, e reunion a dura 1 ora, den kua Hato a aklará entre otro ku niun momentu a bira lomba pa GVI.

Frakshon di MAN a tuma nota di e desishon pa kuminsá e proseso pa manda GVI fayit, i relashoná ku esei Martina a manda e petishon. E tabata ke sa: “Gobièrnu ta na altura di e desishon pa manda GVI fayit? Kon lo bai atendé ku e tareanan ku GVI ta ehekutando awor akí? Dikon gobièrnu no ta bai sigui duna sosten na GVI pa ehekutá su tareanan? Ki ta supsidio ku ta rekerí pa GVI? Ki solushon Minister tin pa evitá ku e mucha ta pèrhudiká?” Parlamentario Giselle McWilliam ayera a amplia riba e preguntanan durante e reunion, promé ku Hato haña palabra pa por kontestá.

E Minister a aklará na promé lugá ku GVI no ta un organisashon ehekutivo (uitvoeringsorganisatie) ku ta kai bou di su responsabilidat polítiko, sino un fundashon ku gobièrnu tabatin un relashon di supsidio kuné via di Ministerio di Hustisia. Meskos ta konta pa e dos otro instansianan Stichting Slachtofferhulp Curaçao (SSHC) i Stichting Ambulante Jusitiële Jeugdzorg (AJJC). “Pues ta trata di un ‘rechtspersoon’ i su ‘bestuur’ por disidí  na momentu ku e ta haña nesesario i ku e motibunan nesesario, pa deklara nan mes fayit. Gobièrnu te awe no a risibí informashon ofisial ku a laga deklará GVI fayit.”

E Minister a sinta na fin di aña pasá ku tur partido i a hasi un apelashon pa nan keda eksistí, miéntras ta kaba di finalisá e fushon dje organisashonnan bou di un dak. “M’a depositá 3 luna mas di supsidio, pa nan por sigui drai, esta paga personal i tambe nan debenan (vaste lasten). Ku otro palabra pap nan sigui kumpli ku nan asuntunan finansiero. A pone abogado disponibel pa yuda nan ku e situashon i a palabrá ku e fundashonnan lo keda eksistí, te ora tin klaridat riba e forma kon lo atendé e parti finansiero dje personal. E direktiva di GVI a entregá un petishon dia 2 di mei na gobièrnu pa yuda ku cessantia, pero ta via di kanal indirekto (prensa), Minister Hato a tuma nota dje desishon di direktiva di GVI pa, kontrali na palabrashon hasí, pidi hues pa deklará e fundashon fayit. Dia 17 di mei, hues a kumpli ku e petishon akí.

Segun Hato, GVI tabata na altura di tur plan pa e fushon. Mihó bisá, e trayekto pa esaki a kuminsá basta tempu pasá. “Den e akuerdo di gobernashon a indiká ku gobièrnu lo sòru pa lanta un ‘Uitvoeringsorganisatie Justitiële Zorg’ i ku esaki lo tuma tur tarea dje 4 instansianan akí, GVI, AJJC, SSHC i büro Voogdijraad. Operashon dje organisashon akí a kuminsá entrante 1 di aprel último. A pidi tur 3 pa paga nan debenan mas tantu posibel ku e plaka di supsidio otorgá. GVI a bisa tin un areglo di pago i lo a kaba di paga esakinan na desèmber 2022. P’esei a pidi nan pasenshi na desèmber ora nan a pidi pa yudansa, pero e direktiva a informá di a haña un ‘aanslag’ nobo di Servisio di Impuesto ku nan no tabata sa di dje. Nan mes lo a bai investigá si ta un kibukashon òf nò.” E Minister a añadí ku ta un echo ta ku último añanan a keda baha e suma di supsidionan, loke a peligrá nan tareanan stipulá pa lei. I komo ku e retonan finansiero tabata peligrá e tareanan ku e instansianan mester a ehekutá, pa kua Minister di Hustisia ta responsabel, a disidí ku ta trese tur tarea bèk den gobièrnu, pa por garantisá ehekushon dje tareanan. “Por bati riba pechu bisa ku esaki  ta un logro.”

Entretantu e fushon ta kla i e organisashon nobo tin un total di 50 trahadó awó ku a bira ámtenar. “Niun hende a pèrdè nan trabou, pero a tuma nan tur bou di e paraplü nobo.” Ademas e direktiva a firma un kontrakt ku kada trahadó, pa garantisá ku ta regla nan cessantie i tambe kumpli ku tur otro derecho laboral.

E Minister a splika ademas ku GVI tabata risibí 1.4 mion florin na supsidio, sigur den 2022. “Ta bon pa remarká ku e trayekto pa lanta un organisashon nobo tabata ‘budgetneutraal’ (no tabatin gastu èkstra). A pone tur servisio dje fundashonnan huntu ku e presupuesto di Bureau Voogdijraad. E solushon pa tur problema, ta e echo ku a realisá e trayekto i ku e 4 instansianan ta kai bou di e paraplü dje organisashon nobo. “E meta dje organisashon ta sirbi e kliente (menor i famia) mihó, i atendé kada kaso di forma holístiko. E echo ku tur ta bou di un dak, ta drecha e trahamentu mas estrecho ku otro. Esaki ta skapa hopi gastu tambe, manera hür di edifisio, awa i koriente, pasó awó ta paga esakinan pa un organisashon.” Riba pregunta adishonal di Parlamentario Ana Maria Pauletta di PAR, Hato a añadí ku niun momentu a bira lomba pa GVI.