Javier ta bisa ku e no por komprondé ta ki preshon Hulanda a pone riba Quincy pa e firma algu ku no tin sèn pa paga i ku el a aktua di mala fe.

Willemstad,– Minister Silvania ta splika ku minister Girigorie a faya ku reglanan di kontabilidat, paso si un minister kier firma una akuerdo ku ta mara Kòrsou mas ku sinku aña e mester bai parlamento pa e haña pèrmit promé ku e firma i eks minister Girigorie no a hasi esaki den e kaso di Kustwacht.

“Bo no ta firma un akuerdo pa 7 aña ku ta mara gobièrnu na 53 mion florin anto no tin sèn pa paga. Raad van Minister a bisa Girigorie bai pidi Hulanda duna sèn pa por paga e kos ei.

Den e dossier mi a haña un karta sin firma, paso e no a manda un karta pa splika Hulanda ku mester di e sèn”, asina Girigorie a splika.

E ta bisa ku gabinete Rhuggenaath ta responsabel pa traha begroting 2021 i 2022 i den e begroting nan aki, nan no a hinka e gastunan èkstra ku mester paga Kustacht den un meer jaren begroting.

“Den e begroting 2023 gabinete Pisas  no a hink’é  aden, paso minister Hato no tabata sa di dje.

Abo den parlamento bo haña e begroting dikon bo no a habri bo boka i puntra dikon e no a presupuestá e gastunan èkstra”. Asina Silvania ta bisa. E ta splika ku minister Girigorie sa di e gastunan i e no a bisa nada, esaki ta akto di mal ehèmpel.

“Mi a rekomendá Hato pa e bai re negoshá ku Hulanda, paso no tin sèn pa paga. Durante último 20 añanan no tabatin sèn pa paga kustwacht manera palabra. Ta 3 mion euro ta paga kustwacht tur aña i esaki mes tabata problema ban kòrda bo hasié dòbel”, pues Javier Silvania.

E ta bisa ku e repartishon no ta hustu, Kòrsou ta paga muchu mas si wak e kantidat di hende ku ta biba den kada pais di reino.

E ta bisa ku por hinka e sèn aki pa Kustwacht, pero lo mester bai kòrta diferente kaminda pa por haña e sèn ei.

Tin akuerdo ku Hulanda ku no por tin begroting tekort mas. E ta bisa ku e no por komprondé ta ki preshon Hulanda a pone riba Quincy pa e firma algu ku no tin sèn pa paga.

E ta bisa ku Quincy Girigorie mester a bisti su karson i bisa Hulanda a lo macho ku e no tin sèn pa paga.

E ta bisa ku ta ku mal intenshon Quincy a hasi e kos aki. E ta puntra ta kiko Hulanda tin kontra Quincy ku e tabatin preshon pa hasi algu ku no ta na benefisio di interes di pais Kòrsou.

“Mester a negoshá ku Hulanda i splika nan ku ta nan mester kubri e gastu èkstra ei”, asina e minister di finansa a duna di konosé.