WILLEMSTAD – Gobièrnu a tuma nota di e desaroyo riba Inteligensia Artifisial (IA) na kuminsamentu di e aña akí i a kuminsá eksplorá i diskutí e tópiko akí ku e ministerionan, p’asina krea mas ‘awareness’ den e aparato. Ministerio di Gobernashon, Planifikashon i Servisio Públiko (BPD) ta menshoná dos posibilidat i tres reto mará na integrashon di IA den aparato gubernamental. IA ta yuda optimalisashon di Servisio Públiko i yuda tuma desishon basá riba dato. Pero tin reto pa ku Privasidat i Seguridat di Dato, Dependensia di Teknologia Eksterno i Divishon Digital. Teniendo e puntonan akí na kuenta, un maneho integral riba IA riba término kòrtiku lo tin ku bira prioridat di ministerio di BPD.

Gobièrnu ta remarká ku e desaroyo i uso di IA a aselerá rònt mundu di tal manera ku aktualmente e aparato no a antisipá integrashon integral dje teknologia nobo akí den gobièrnu. A identifiká kaba sí, ku IA ta ofresé posibilidat i retonan pa gobièrnu di Kòrsou. Asina direktor di maneho di BPD Eustatius a kontestá Parlamentario Rennox Calmes na nòmber di Minister Ornelio “Kid” Martina.

Un dje posibilidatnan di IA ta optimalisashon di Servisio Públiko. “IA por yuda na optimalisashon di servisio di kuido di salú, tráfiko, kombatí krimen i mas. Ku yudansa di IA, gobièrnu por implementá sensor inteligente, análisis di dato avansá i sistemanan outomatisá pa mehorá efisiensia i kalidat di servisio ku ta ofresé na siudadanonan. Otro posibilidat ta ku por tuma desishon basá riba dato. “IA por asistí gobièrnu den tumamentu di desishonnan stratégiko. Ku kapasidatnan analítiko avansá, IA por analisá kantidat grandi di dato, identifiká tendensianan i brinda informashon esensial na desishonnan riba maneho, ekonomia, medio ambiente i otro área stratégiko.”

Gobièrnu ta menshoná tres reto: Privasidat i Seguridat di Dato; Dependensia di Teknologia Eksterno; i Divishon Digital. “Integrashon di IA den gobièrnu ta presentá hopi reto relashoná ku privasidat i seguridat di dato. Gobièrnu mester tene un enfoke rigoroso riba protekshon di dato, sigurando ku IA ta manehá informashon sensitivo di siudadanonan di manera étiko i legalmente. Tambe gobièrnu mester tuma prekoushon nesesario pa sigurá i protegé tur siudadano i instansia su abilidat di por tuma desishon informá sin influensia òf manipulashon di sistemanan IA.”

Ademas pa implementá IA na nivel gubernamental, lo por nifiká ku mas ku ta e kaso awó kaba, lo mester konsultá i kumpra teknologia eksterno. “Esaki lo bai kousa dependensia i gastunan adishonal pa gobièrnu di Kòrsou. Ku integrashon di IA, por kaba ku e divishon digital entre esnan ku tin akseso i konosementu di teknologia i esnan ku no tin e abilidatnan akí. Gobièrnu mester sigurá ku no tin eksklushon digital i ku tur sekshon di komunidat tin oportunidatnan igual pa benefisiá di teknologia IA. Teniendo e puntonan akí na kuenta, un maneho integral riba IA riba término kòrtiku lo tin ku bira prioridat di ministerio di BPD.”

Pa manehá e retonan i optimalisá e posibilidatnan di IA, gobièrnu lo mester establesé un enfoke riba étika i regulashon tambe. Kolaborashon estrecho ku ekspertonan den e área, empresanan privá i komunidatnan lo ta esensial pa desaroyá un kuadro legal i regulatorio adekuá pa protegé privasidat, garantisá transparensia i evitá abusu di teknologia IA. “Den e kuadro akí tambe minister di BPD a risibí resientemente e konsepto di e tratado di Konseho Europeo, kaminda ta formulaá e prinsipio i reglanan básiko pa uso di IA na un manera responsabel i ku ta kuadra ku derecho humano, demokrasia i derecho di estado. Ta premirá ku e tratado final lo ta kla fin di 2023. Gobièrnu di Kòrsou lo bai tene debido kuenta ku e tratado akí den futuro, ora tin ku hasi adaptashon di nos leinan pa ku implementashon i uso di IA.”