Sirugano Emma Paes ku a operá e mucha ku a pèrdè man ku wowo.

Hulanda, — Mientras mayoria hende na Hulanda tabata selebrá komienso di aña 2023, tirando vürwèrk, duna otro brasa yen di legria, habri bòter di shampaña bebe, e sirugano Emma Paes i su tim tabata druk den sala di operashon na “Wilhelmina Kinderziekenhuis” na Utrecht.

Durante e operashon riba un man di un mucha di 11 aña, no a keda e dòkternan nada mas ku konkluí ku mester apuntá e mucha hòmber su man. Mester a korté te na su pòls. Esaki tabata inevitabel. No muchu ratu despues, nan a disidí ku mester a saka e mucha su wowo drechi tambe pa motibu ku esaki tambe a sufri un leshon grave. Esaki no ta un felis aña, esaki ta algu teribel. Kon nos por evitá ku esaki lo bolbe sosodé otro aña ?”, Paes a puntra su mes despues di e operashon.

Na momento ku e sirugano plástiko a kana bai su outo despues di trabou, el a wak ariba i wak e “ vürwèrk ” ku tristesa. “Mi a sinta mi mes hopi tristu pa e famia, pa e viktima i tur sobrá viktima. Desafortunadamente, semper nos ta wak un “pik” di leshonnan grave alrededor di víspera di aña nobo.

Paes ta spera ku mayornan, hóbennan i muchanan bira mas konsiente di kiko “vürwèrk” por hasi ku nan”. E riesgonan mará na tiramentu di “vürwèrk” no mag di keda balotá. E grado di leshon, for di un kemadura te un leshon grave ta eksistí realmente, e sirugano a enfatisá.

Pa hasi hende mas konsiente, e sirugano a kompartí su eksperensia ku un emotivo mensahe riba internèt despues di e operashon. “ Un hende por splika mi kiko nos ta hasiendo den nos pais?”, Su mensahe a keda kompartí masalmente i el a resultá den un avalancha di reakshon, positivo i negativo. Tabatin personanan tabata pro su mensahe i tin tabata kontra.

E peligernan mará na “vürwèrk” ta keda tumá seriamente? Paes ta kere ku no. “ Bo mes no mester sende e “vürwèrk” pa bo bira viktima. Nos a yega mira “vürwèrk” bula bai den direkshon di hende ku tabata pará leu ku e konsekuensha ku el a bin pèrdè su orea.

Segun Paes el a mira hopi kos na hospital di Utrecht. Pero e debate di prohibishon di “vürwèrk” e ta lagé den man di politikonan nashonal. “ Mi no tin sufisiente konosimentu pa mi por duna mi opinion riba e tópiko aki, pero mi ta spera ku hendenan bira mas konsiente i keda mihó informá”, Paes a konkluí. Ora bo komprondé ku tiramentu di  “vürwèrk” ta pa plaser, kada viktima ta sinti demasiado. Kada un ta dimas.

Te na momento ku e sirugano a duna un entrevista, tabatin 24 persona ku mester a bai Hospital na Rotterdam ku herida na nan wowo, 5 di e pashèntnan tabata mas jòng ku 17 aña, esun di mas jòng tabatin 7 aña. 7 di nan mester a keda operá. Esaki tabata mas hopi ku e último 2 añanan. E tempu ei, no mester a operá niun hende. E kantidat total di viktima e aña aki, no ta konosí.