For di luna di novèmber di 2022 e hòmber a hui i no a keda hañá mas.

SAN JUAN – Un muhé a hasi uzo di ret nan sosial, pa di e forma aki pidi kaptura di su propio tata na Puerto Rico. Ta trata aki di un hòmber di 51 aña, kende supuestamente ta vinkulá ku múltiple akto di pedofilia, inkluyendo su propio nietu nan.

Ana Rosa Albarran, yu muhé di Davie Albarran , a inisiá un kompaña intenso pa asina logra kaptura di su tata, kende ta sospechoso den delitu nan seksual kontra menor nan di edat na Florida.

Davie Albarran, kende ta sospechá ku a hui pa Puerto Rico, a keda señalá komo esun responsabel di abusu nan seksual na 20 menor di edat, entre nan dos di su nietu nan i vários mucha nan den serkania di su teritorio familiar i sosial.

Despues di keda konfrontá pa su yu nan na Florida, segun un video publiká riba ret nan sosial, e sospechoso a hui e Dia di Akshon di Grasia di 2022 i ta sospechá ku ta skondí na San Lorenzo, su siudat natal na Puerto Rico.

Ta sospechá ku esaki a biaha direkshon nort di Estádos Unídos i despues pa Puerto Rico pa asina keda serka amigu i famia nan. Segun publikashon nan di e yu muhé, nan a haña algun yamada ku a indiká na nan ku e búskeda mester keda hasí na Puero Rico.