Ministerio Públiko  lo bai dediká su mes na kombatimentu di trafikashon i kontrabanda di hende.

WILLEMSTAD——Ku yegada di un fiskal spesialisá den kasonan di trafikashon di hende medio òktober di e aña aki na Parkèt di Promé Instansia Kòrsou, e parkèt ta fortifiká e kartera di trafikashon i kontrabanda di hende.

E kartera lo ta bou di enkargo di dos fiskal huntu ku un sekretario di parkèt spesialisá. Di e manera aki, Ministerio Públiko ke duna un impulso fuerte pa kombatí e tipo di kriminalidat aki. No pa banda di kasonan penal so, pero tambe riba nivel di maneho, Ministerio Públiko ta dediká su mes na kombatimentu di trafikashon i kontrabanda di hende. Di e manera aki, e tim di Ministerio Públiko tambe lo kontribuí na un kampaña di konsientisashon di e taskforce ku ta trata trafikashon di hende i di Actiecentrum Ondermijning Curacao (ACOC).