E trio no por keda hañá, segun e abogado nan.

CARACAS – E oposishon venezolano a denunsiá den oranan di djarason tras di lomba e desaparishon fòrsá di tres di su dirigentenan, detené un siman pasá pa e Servisio Bolivariano di Inteligensia Nashonal pa nan supuesto partisipashon den un konspirashon kontra Nicolas Maduro.

Ta trata aki di Juan Freites, Luis Camacaro i Guillermo Lopez, kabesante nan di e kampaña di kandidatura presidensial di Maria Corina Machado na e estado di Vargas, Yaracuy i Trujillo.

E persona nan aki, segun a keda denunsiá pa Omar Mora Tosta, un di e defensor nan di detenido, ta ainda pèrdí di un forma forsoso.

Segun Mora Tosta, e abogado nan i famia nan a rekoré vários sentro di reklushon sin topa ku e tres opositor nan, ku tabata forma parti di e partido Vente Venezuela, liderá pa Machado.

E fiskal general a imponé pa diktadura chavista, Tarek William Saab, a anunsiá den oranan di djabièrnè siman pasá, detenshon di e siudadano nan aki, kende nan a akusá di ta kómplise di un grupo terorista ku ta plania di ataká vários kuartel militar.

Debí na e situashon, e ekipo di defensa di e tres opositornan a manda e señalnan di alerta pa organismo nan internashonal manera entre otro ONU, OEA i CIDH pa asina intervení den e kaso.

Den mesun rosea, abogado nan a presentá un karta na e Defendora di Pueblo, solisitando pa defendé derechinan konstitushonal i prosesal di e persona nan aki.

Segun e abogado Eduardo Torres, no ta posibel ku tin detenshon nan arbitrario i desaparishon nan forsoso ta bira komun na e pais.

E partido Vente Venezuela tambe a denunsiá ku Camacato i Freites a keda presentá na un tribunal sin presensia di nan abogado nan privá i sin kontakto di famia nan.

Segun e partido, e kaso nan aki mester keda realisá ku públiko imponé i sin e konsentimentu di e detenido nan, loke ta evidensiá ku e forma di prosedé ta ilegal i arbitrario.

Di otro banda, e partido opositor a rechasá kualke tipo di intento di agreshon kontra Maduro i a ninga ku e ekipo di e kandidato presidensial di mayoria opositor, Maria Corina Machado, ta relashoná ku e echonan aki.