Parlamentario Osepa a risibi algun kontesta riba preguntanan hasi den direkshon di Prome Minister.

WILLEMSTAD——-Osepa tabata ka sa tambe kiko ta e esfuersonan ku gobièrnu ta hasiendo, pa sigui mantené óf baha gastu di bida. Pisas ta splika ku e meta prinsipal pa mitigá e efektonan di subida di preis di sierto produkto riba gastu di bida general, gobièrnu a laga analisá i presentá algun rekomendashon pa por realisá e meta.

“Pa mitigá e efekto di subida di kombustibel, gobièrnu a logra kita temporalmente sierto komponente fiskal den e ‘tarievenopbouw’ di preisnan di kombustibel. Esaki pa medio di un ‘Tijdelijke landsverordening mitigeren brandstofprijzen’ (e asina yamá ‘aanschrijving’). E trayekto di ‘aanschrijving’ a kubri eksonerashon temporal (te ku mart 2023) di pago di ‘omzetbelasting’ (OB) i ‘invoerrechten’ na momentu di importashon di kombustibel i tambe eksonerashon temporal di OB na ‘groothandel’ (esta Curoil).”

Pisas ta remarká den mesun rosea ku e ‘aanschrijving’ menshoná a kaduká. “E komishon ku ta kai bou di responsabilidat di Promé Minister introdusí resientemente, tin komo tarea pa buska posibilidatnan (tambe) nobo pa mitigá e subida di preis. Mientrastantu ku koperashon di Ministernan, gobièrnu a logra alargá e medidanan di e ‘aanschrijving’ te ku yüni último.” El a splika tambe ku na momentu ku PDVSA a bandoná Kòrsou na aña 2019, produkshon di kombustibel na Kòrsou tabata na paliger. Segun Pisas, ta trata akí no solamente di suministro di tur produkto di kombustibel, pero tambe produkshon i distribushon di awa i koriente. Pa salbaguardiá suministro i distribushon di esakinan a bini ku un plan di finansiamentu ku yama Plan B3.