DEN HAAG—Geert Wilders (PVV), van der Plas (BBB) i Yesilgoz (VVD) a sigui papia ayera nochi ku informadó Plasterk.

Informadó a invitá Omtzigt (NSC) pa duna splikashon, pero e no a presenta. E desison di Omtzigt pa bandona mesa negosashon, a kai komo sorpresa pa e tres otro partidonan den negosashonnan di formashon. Tur tres lider a reakshoná ku asombro i desepshoná. Plasterk tambe tabata sorprende. El a haña e informashon via un app. E otro lidernan tampoko tabata na altura i a tende e notisia via media. Ku Omtzigt a bisa ku su partido NSC no ta partisipa mas na formashon na e momentunan aki, no ta nifiká ku e partido no kier negosha den siguiente fase. El a bisa den prensa ku e ta habri pa sigui negosha ku otro partidonan. Pero e konfiansa entre lidernan ta afekta. Plaster a invita tur partidonan na un reunion ayera nochi, tambe Omtzigt pa haña klaridat. Pero Omtzigt no a bai. Pa e lider di NSC e rondanan ta kla p’e den e fase aki.