WILLEMSTAD – Miembronan di Parlamento pa frakshon di PAR, Steven Croes, Zita Jesus-Leito i Ana Maria Pauletta a pidi Presidente di Parlamento Charetti America-Francisca pa konvoká un reunion di Komishon Sentral pa trata e tema ‘salú mental, e pandemia silensioso’. Nan ke pa invitá e instituto PSI-Skuchami, ku ta ofresé kuido ambulante pa salú mental.

Nan a manda nan karta siman pasá p’e Presidente. No tin un fecha ainda pa e reunion akí. Frakshon di PAR a mustra riba echo ku segun World Health Organization (WHO), salú mental despues di Covid-19 ta un parti di salú públiko ku nos no por bira kara mas p’e. Durante i despues di Covid-19 por a mira un subida drástiko di nesesidat di asistensia emoshonal, sikológiko i sosial. Organisashon, instituto i profeshonalnan di kuido a sinti e efekto akí di forma direkto, muchu mas kliente a yena na nan porta.

“Tambe komo pais nos por a tuma nota di e debilidatnan den e kadena di kuido mental. PSI-Skuchami, komo e instituto ku ta ofresé kuido ambulante pa salú mental, ta duna un vista amplio di e desaroyonan den nos komunidat. Salú mental ta sumamente importante pa kada persona. E ta afektá kon un hende ta prosesá informashon, tuma desishon i manehá bida en general. Miedu, hansha i inseguridat komo sentimentunan negativo a oumentá, ku tur e konsekuensianan ku esaki ta trese di dje. Komo pais nos por a mira e konsekuensia di esaki den diferente forma, entre otro den e subida di kasonan di violensia, abusu di alkohòl i depreshon.”

Komo miembronan di Parlamento, e tema akí ta di balor grandi pa deliberá riba dje. Asina Croes, Jesus-Leito i Pauletta ta enfatisá den nan karta. “Hasiendo uso di e plataforma di Parlamento nos por krea konsientisashon pa e tópiko, pero tambe haña informashon ku por keda usá pa deliberashon ku Parlamento lo mester hiba den futuro.” P’esei e frakshon ta pidi Presidente America-Francisca pa yama un reunion di Komishon Sentral ku e tópiko ariba menshoná i ademas invitá representantenan di PSI-Skuchami pa duna un presentashon tokante nan eksperensia.