WILLEMSTAD – Parlamento mester bini huntu otro siman djamars for di 9’or di mainta, pa un reunion den Komishon Sentral tokante lei di behes (AOV). Lo deliberá ku Minister di Desaroyo Sosial, Labor i Bienestar (SOAW), Ruthmilda Larmonie-Cecilia, riba petishon di frakshon di PAR entregá dia 31 di yanüari último na Presidente di Parlamento Charetti America-Francisca. Frakshon PAR ke tende dje Minister kua ta gobièrnu su plan pa ku e lei akí.

Segun PAR, durante tratamentu di e presupuesto a bini dilanti ku nos mester bai pone atenshon na e lei di AOV (Landsverordening Algemene Ouderdomsverzekering P.B. 1960 no.83) ku aktualmente ta konserní kasi un terser parti di nos pais. “Di e 51 mil hendenan ku ta kobra AOV, alrededor di 9 mil hende ta risibí esaki komo úniko entrada. Teniendo kuenta ku gobièrnu ta premirá ku lo no bini indeksashon di e montante ku e personanan ku ta kobra esaki so, apesar ku ta premirá un kresementu ekonómiko, ta hopi importante pa frakshon di PAR deliberá ku gobièrnu riba e lei di AOV i e trayekto pa kambia esaki.”

PAR ta sigui bisa den su karta na Presidente di Parlamento, ku segun investigashonnan hasí na Kòrsou e grupo di personanan ku ta kobra AOV, ta den rísiko mas haltu pa kai den pobresa. I ku p’esei mester tin un maneho di prevenshon dirigí riba e grupo akí spesífiko, pa asina yega na un direkshon i solushon pa salbaguardiá e kalidat di bida di e penshonado. “Pa garantisá ku protekshon di esnan mas vulnerabel den komunidat ta garantisá pa futuro i no ta dependé di e beis/motivashon di kada mandatario, ta nesesario adaptá e lei di AOV ku e urgensia nesesario. Den kuadro akí ta nesesario pa gobièrnu skucha posishon di Parlamento den esaki mas pronto ku ta posibel den e trayekto.”

Minister Larmonie-Cecilia anteriormente a para ketu na sifranan di adultonan mayó ku tin solamente e penshon di AOV komo nan úniko entrada. El a kontestá Parlamento na medio ougùstùs aña pasá por eskrito riba preguntanan di Parlamentario Giselle Mc William. Mc William tabata ke sa si e Minister ta na altura dje oumento di ‘vergrijzing’ grandi i lihé di un parti di nos poblashon. Na promé lugá e Minister a informá ku gobièrnu ta na altura ku tin dòbel embeyesimentu tumando lugá den pais. I si no atendé esaki di un forma strukturá i preventivo, e gastunan di e adulto mayó na Kòrsou lo bira impagabel.

E Minister a menshoná ku esaki ta pa motibu ku nos hendenan hóben ta emigrá pa buska un mihó futuro i no ta bin bèk. E natalidat tambe a baha drástikamente. I tin un grupo grandi di hende ku ta birando adulto mayó segun sifranan di e Ofisina Sentral di Statistik (CBS). Ademas e Minister di SOAW a informá Parlamento di lo duna un komishon e tarea pa aktualisá e maneho yamá ‘Toekomstige Seniorenbeleid 2020-2025’ pa e siguiente 5 aña, teniendo kuenta ku e lastu desaroyonan. “Nos ta bai hasi uso di e puntonan mas importante di e nota akí, pero nos ta bai aktualisé, teniendo na kuenta e realidat di e momentu akí di e adulto mayó. Aktualmente tin 9.600 adulto mayó ku tin komo úniko entrada, e penshon di AOV. Esei ta 18% di tur nos hendenan grandi. E personanan akí ta kai den pobresa ora nan baha ku penshon, pa motibu ku nan no tin un penshon adishonal. P’esei a disidí pa oumentá e ‘toelage’ di AOV ku 30% for di 17 di yüli 2023.”

Dos siman despues di a kontestá Mc William, Minister di SOAW Larmonie-Cecilia a kontestá Parlamentartio Ramón Yung tambe su preguntanan tokante gastunan haltu di entre otro siudadanonan mayó desabilitá. Riba e pregunta kon un siudadano desabilitá ta bin na remarke pa por haña sosten finansiero serka gobièrnu, Minister di SOAW a kontestá entre otro: “Sí e siudadano ku un desabilidat yega e edat di 65 aña, e por apliká pa e kompensashon di AOV di 169 florin, sí e siudadano akí tin un entrada te 862 florin.” Segun e Minister, tur siudadano ku un desabilidat ku ta kai bou di e kategoria ‘on- en minvermogenden’ ku ta bibá i registrá na Kòrsou i ku ta kumpli ku e leinan i reglanan na vigor, por bin na remarke pa sosten finansiero di parti di gobièrnu.

Parlamento awó ta pendiente pa hasi algun pregunta den un reunion di Komishon Sentral otro siman. Kada Parlamentario ku inskribí na tempu pa hiba palabra, lo haña 15 minüt den e promé tanda i 10 minüt den e segundo tanda.