WILLEMSTAD – Ana Maria Pauletta di PAR no tabata nada kontentu ayera ku e manera kon henter e proseso a bai, pa kana yega na e Lei di Reino konteniendo aprobashon dje Tratado Internashonal entre e Reino Hulandes i e Repúblika Malta pa evitá impuesto dòbel.

Parlamentarionan ku no ta den e komishon di Reino no a risibí e teksto dje tratado. Porlotantu nan mester a bai buska esaki riba website di gobièrnu hulandes. I e tin un poko problema tambe ku e echo ku tin algun kondishon i definishon diferente pa Malta kompará ku Kòrsou den e tratado. E ke sa pues di gobièrnu hulandes dikon tin e diferensia si ta papia di un tratado entre dos pais.

Riba proposishon di Presidente di Parlamento Charetti America-Francisca lo kompartí informashon ku tur komishon ku lo mester bai atendé ku un lei di reino ku ta mishi ku pais Kòrsou, manera por ehèmpel komishon Finansa tambe. Den e kaso akí, te ku resientemente ta e miembronan di komishon di Reino di Parlamento di Kòrsou so a risibí tur informashon. Segun Sheldry Osepa di PNP, komishon Reino a haña un ‘hard copy’. E no sa dikon e tratado no ta riba wèpsait di gobièrnu di Kòrsou, pero echo ta ku e komishon a haña e teksto.

Riba esaki Pauletta a proponé pa Parlamento haña un ‘technische briefing’ (un splikashon tékniko) pa komprondé hopi bon kiko e lei i e tratado ta enserá. Spesialmente e delegashon spesial ku lo mester bai Hulanda pa kaba di atendé esaki, lo mester ta hopi bon informá. “Kon ta manehá e parti akí komo miembro di Parlamento, sin pasa den e proyekto di lei akí? Kon nos lo bisaa si nos ta aprobá òf bai kontra di esaki, na momentu ku kontinuá e trayekto dje tratado akí?” Manera proponé, un eksperto lo bai duna Parlamento tur splikashon. P’e miembronan di oposishon tabata lamentabel, ya ku ora ku e reunion a sera ayera ya mester a saka un relato pa bai Hulanda, siendo ku Parlamento no tabata hopi bon informá.

Ademas Pauletta a para ketu na diferensianan ku el a nota den e tratado na ingles, despues di a buska e teksto e mes pa lesa ‘online’. Den e tratado tin algun definishon general. Artíkulo 2 ta regla e impuestonan eksistente na kua e kombenio ta apliká. Pa Malta ta trata partikularmente di ‘income tax’ esta inkomstenbelasting, yamá ‘Malta-tax’,. Pero pa Kòrsou no ta e ‘income tax’ so, sino tambe ‘wage tax’ (loonbelasting), ‘profit tax’ (winstbelasting) i ‘dividend tax’ (dividendbelasting), yamá ‘Curaçao tax’.

Artíkulo 3 ta definí e término ‘national’, esta ken ta konsiderá komo un siudadano dje pais. Pa malta ‘national’ ta nifiká: kualke individio ku tin e nashonalidat di Malta; i kualke persona legal, sosiedat òf asosiashon ku ta derivá nan status for di e leinan vigente na Malta. Pero pa Kòrsou ‘national’ ta nifiká: kualke individio ku tin nashonalidat hulandes i ku por vota na Kòrsou si e ta mayor di edat i ta presente na Kòrsou. Sinembargo si e individuo no ta presente na Kòrsou, e mester a nase na Kòrsou òf tabata biba aki durante no ménos ku 5 aña. I ademas kualke persona legal, sosiedat òf asosiashon ku ta derivá nan status for di e leinan vigente di Kòrsou.

Pauletta: “Esei kemen ku ta ekskluí hende ku a nase na Kòrsou i a bai biba otro kaminda denter di 0 pa 5 aña, tur hende bou di 18 aña i tambe tur ku ta biba pafó di Kòrsou, for di ‘nationals’ di Kòrsou. Mester kòrda ku un tratado ta mas altu ku leinan lokal. E definishon akí ta konta pa lei lokal tambe?” Pauletta a splika su pregunta ku un  ehèmpel: un hende por kobra AOV (penshon) ora ku el a biba 15 aña na Kòrsou. Kemen si e definishon dje tratado ta konta pa lei lokal tambe, ta nifiká ku e periodo a baha bira 5 aña. “Esaki ta konta pa tur otro lei? Di unda a saka e definishon?”

I finalmente e ke pa splika artíkulo 16 insiso 3 dje tratado, ku ta papia di artista i boseronan. Segun Pauletta esaki ta regla ku e pais kaminda e artista/bosero a nase lo kobr’é impuesto ora ku e bai traha den eksterior. Kemen ora un lokal ku bai duna un presentashon na Malta, ta Kòrsou lo kobr’é impuesto i visevèrsa. E ke sa si ta asina OESO ta regla esaki.