Eksportá: tin intenshon pa inisiá un proseso di eksportá peska prosedente di Venezuela pa Union Oropeo, despues ku e barkunan di fruta drenta haf bèk e luna aki.

Mundo Nobo—Debí na un negligensha na Servisio di Salubridat Públiko Kuido di Medio Ambiente, Kòrsou no ta konsiderá komo un teritorio riba lista di Union Oropeo pa por eksportá Piska. E servisio konserní, no a tene su mes na un “deadline” pa entrega un ouditorio, unda Kòrsou ta keda riba lista komo pais di transborde di peska internashonal.

E problema na diferente okashoná a keda deliniá den edishonnan anterior di Vigilante, pero apesar di publikashonnan, tòg e proseso pa trata na rekuperá e retraso no a konkluí. E problema ta limitá eksportashon di piská, tantu serka piskadónan lokal komo esnan ku ta importando for di Venezuela. Tin tambe e posibilidat pa laga e barkunan venezolano trese e piska den haf di Kòrsou, unda por laga eksportadónan kumpra e kargamentu i inisiá un proseso di eksportá peska pa Hulanda. E posibilidat na e momentunan aki ta nulo.

E problema a kuminsá na momento Kòrsou a neglishá di kumpli ku kondishonnan di ouditorio, pa por mantené su lisensia di laga barkunan di peska internashonal piska bou di bandera di Kòrsou. For di aña pasá mayoria barku, tantu esnan di peska komo barkunan kargadó, a opta pa kanselá nan registrashon bou di e bandera di Kòrsou. E proyekto ku Kòrsou tabatin pa permití barkunan e.o. spañó piska bou di nos bandera a sigui den problema serio. Ministerio di Salubridat Públiko a keda sin atendé resultado di un ouditorio i konsekuentemente Kòrsou a pèrdè mayoria barku ku tabata registrá bou di su nòmber.  E problema a kuminsá despues ku Kòrsou no a pasa e ouditorio di EU, Union Oropeo. Ta trata di un diskushon di hopi aña entre MEO i GMN, kual a pone ku GMN, Departamentu di Salubridat di Kòrsou no a kumpli ku e ouditorio.

Pa algun aña tin un grupo di barku, ta piska bou di bandera di Kòrsou. E lisensia,  Kòrsou a kuminsá otorgá despues ku prinsipalmente Spaña a stòp di duna pèrmit pa su barkunan di peska por piska den awanan internashonal. Seguidamente, tabata Ramon Chong trahando na MEO i eks minister Stanley Palm a pusha e proyekto pa habri e posibilidat pa e barkunan por piska bou di bandera di Kòrsou. Pero pa por hasi esaki, Kòrsou mester tene su mes ta reglanan bastante estrikto i alabes pasa un lei lokal riba higiena di prosesá peska lokal. E lei nunka no a pasa atraves di aña Kòrsou a subi lista hel di Union Oropeo. Apesar di esaki tòg den pasado, Kòrsou a logra drecha su sistema di monitoria e barkunan piskando den awa internashonal ku a aliviá e problema. Kòrsou a pèrdè e sosten di Union Oropeo di por laga e barkunan sigui piska bou di bandera di Kòrsou. E barkunan tabata paga Kòrsou pa uzo di e lisensia pero tambe kada biaha nan subi reda tambe tabata paga Kòrsou un kota. Union Oropeo di nan banda ta eksihí Kòrsou pa mantené nan mes na kondishonnan stipulá.

For di e ouditorio kondusí entre 1 pa 11 di novèmber 2022 pa Union Oropeo, Kòrsou mediante Ministerio di Salubridat Públiko no a hasi nada ku e resultadonan. Tabata for di Febrüari 2022, ku Kòrsou mester a kuminsá tuma medida di prekoushon pa Union Oropeo por duna outorisashon na Kòrsou. E departamento di Inspekshon na Salubridat Públiko ta enkargá pa hasi e trámitenan di adaptashon, pero ni Inspekshon i niun otro departamento mas den gobièrnu a reakshoná riba e rapòrt di Union Oropeo.

Direktor na Inspekshon, dr. Sirvin Keli, no tabata di akuerdo ku e proyekto, pa motibunan deskonosí. A konsehá Minister Dorothy Janga di Salubridat pa hasi un sondeo den servisionan di gobièrnu kiko ta e benefisio for di e proyekto. Ministerio di Salubridat a duna fundashon SOAB pa hasi un sondeo, unda no a logra finalisá na tempu pa por interseptá den e rekomendashonnan di Union Oropeo.  Ademas SOAB no a kalkulá tampoko e impakto ekonómiko  na nivel makro dor di keda sin kalkulo e entrada riba impuesto i registrashon di e barkunan. Ni tampoko SOAB no a evaluá e restrikshon pa por eksportá peska lokal pa Union Oropeo. Na e momentonan aki, Kòrsou no por uza unu di su posibilidatnan pa orientá riba eksportashon di peska. Pasobra na momento Kòrsou no kumpli ku e ouditorio di Union Oropeo, eksportashon di peska ta keda limitá.