KORAAL SPECHT—Segun tratamentu den Korte Penal di Promé Instansha, polis a drenta sèl di e hòmber C. L., akusá di a asesiná e hòmber di fam Lloyd riba 19 di mei 2023.

Djabièrnè último, korte a bolbe laga Lourens bini dilanti un hues pa splik’é ku tin diferente investigashon mas pa tuma lugá den su kaso. Unu di nan ta su telefòn selular ku investigadónan a drenta sèl i bai kuné. Tabata L. mes kende a duna di konosé durante su último tratamentu na desèmber, di tabata dispuesto na duna e telefòn. “Mi no ta kontentu”, e la duna di konosé na Hues mr. Carmelia djabièrnè último. Segun L., anke e la duna aprobashon, pero polis no mester a bai ku e telefòn.

Fiskal di Ministerio Públiko a súplika Lourens si e ta koperá pa duna nan e kodifikashon di e telefòn pa nan por investigá aden i Lourens a aseptá esei. Segun Lourens no t;e a mata Lloyd. E la sali su trabou riba e dia en kestion i despues a pasa toko pa kumpra un paki di sigaria. Segun e la splika korte, tabata alrededor di 7or di anochi. Na e toko e la keda i hunga dominó. Su abogado, sra. Mr. Themen Cairo a súplika korte pa buska e testigunan na snèk pa konfirmá ku su kliente tabata hunga dominó na momento e asesinato di Lloyd a tuma lugá den bario. E zonidonan di bala a “shòk” e bario i despues a bin haña Lloyd abou na suela, perforá ku impaktonan di bala.

Fiskal di Ministerio Públiko, a bolbe posponé e kaso pa mas investigashon. Ta bai skucha mas testigu den e kaso miéntras ta investigá tambe un “voice note” riba telefòn di Lourens. Segun e note ei ta liber’é di persekushon. Tambe Ministerio Públiko ke wak kon leu por yega n’e grabashonnan pa por averiguá si en bèrdat Lourens tabata hungando dominó na momento e tirunan a bin kai.

E kaso ta bou ouspisio di Hues mr. Sigmar Carmelia. Korte a duna Ministerio Públiko, oportunidat pa duna un rekuento kon leu e kaso ta den su fasetanan investigativo. Segun Fiskal Girigoria Hernandez falta mas informashon pa e kaso yega tratamentu, programa 1 di mart 2024. Segun e fiskal a logra risibi bastante informashon for di último tratamentu. Ya ta konosí  a bini kla e rapòrt sikológiko i sikiátriko di e akusado Lourens. Tambe Ministerio Públiko a risibi e rapòrt patólogo for di ADC, unda por averiguá e kantidat di impaktonan risibi i daño okashoná na kurpa i kara di e víktima. Mas aleu, segun e fiskal e unidat investigativo TFO a finalisá ku 3 rapòrt kual ta deskribí e asesinato riba 19 di mei, kantidat di huls investigá riba Kaya Nubia pero tambe un rapòrt amplio riba e aresto di Lourens riba 5 di Yüli. Durante su aresto, Tim di Aresto mester a uza arma reglamentario despues ku Lourens a los bala riba nan. E akusado a sali herida ku dos perforashon di bala. Entretantu a keda konfirmá tambe ku lo no tabata nesesario pa pèrsigui e miembro di AT kende a los a tirunan riba Lourens.