Willemstad- Preis di krudo i kombustibel riba nivel internashonal ku a sigui subi, tin un efekto asendente riba preis di kombustibel lokal.

Desaroyonan relatá ku un demanda haltu di krudo riba nivel internashonal, tin komo resultado ku e preis di kompra di kombustibel na pòmp ta subi ku 13 sèn.

Te na e momentonan akí, kompará ku den luna di yüli, preis di krudo riba nivel internashonal a sigui subi. Den luna di yüli kompará ku luna di yüni tambe e preis riba nivel internashonal a subi supstansial yega un promedio di $76.03. Den luna di ougùstùs ta antisipá ku e preis lo subi yega un promedio di mas òf ménos $ 82.30.

Ku e subida menshoná, preis di tantu gasolin i diesel ta subi ku 13 sèn entrante 29 di ougùstùs 2023.

E subida di preis di gasolin i diesel ta relatá, banda di e preis di kompra riba nivel internashonal, tambe na e komponente di garantia di suministro di kombustibel, e asina yama B3 ku a wòrdu re- introdusí na yüli último bek. Riba petishon di Minister di Desaroyo Ekonómiko, sr. Ruisandro Cijntje, konseho di Ministernan a tuma e desishon pa Curoil i RdK temporalmente prefinansiá e gastunan operashonal di B3. Na yüni 2023 e prefinansiamentu a terminá i e komponente di B3 a bolbe wòrdu introdusí por parti den e preis di kombustibel. E prefinansiamentu temporal di RdK a terminá i Curoil, riba petishon di Minister Cijntje, a kontinuá ku su parti di prefinansiá di e gastunan di B3  ku eliminashon gradual te ku luna di òktober próksimo . Ku esaki, e komponente di B3 ta wòrdu re-introdusí den su totalidat den e preis di kombustibel.

E preis di krudo riba nivel internashonal ta keda hopi volatil i ta antisipá ku e preis lo sigui subi.