Na yanüari lo reuni den komishon di reino pa asina atendé diferente tópikonan di paisnan den Reino.

Willemstad, — Islanan den Reino lo bai trata asuntunan interparlamentario na luna di yanüari próksimo di 2024.

Parlamentario Giselle Mc William a kompartí ku lo reuní den komishon di reino pa lokual ta trata asuntunan di Reino, relashonnan interparlamentario i relashonnan eksterior. Ta asina ku Giselle a kompartí ku Areglo di Disputa ya tei kaba, pero ku no por a sigui riba esaki pa motibu di Amerigo Thode su malesa. Amerigo Thode tabata presidente di e Komishon di Asuntunan di Reino, Relashonnan Interpalamentario i Relashonnan Eksterior. Ya komo ta konosí kaba Amerigo Thode a fayesé dia 14 di desèmber último.

Na mei 2023 a trata e temanan den konsulta interparlamentario di Reino (IPKO): kambio di klima i e adaptashon, edukashon, próksimo konferensha di Reino i e impakto i e proseso di kolonialismo i historia di sklabitut. E konsulta interparlamentario di Reino ta un konsulta di kual e parlamentonan di e paisnan den Reino ta partisipá den dje, dos biaha pa aña. Ta asina ku na yanüari e konsulta ta tuma lugá den un di e paisnan di Karibe hulandes, i na yüni e ta keda organisá den Eerste i Tweede Kamer na Den Haag.

Reunionan anterior a resultá na diferente investigashonnan entre 2017 i 2022 di diferente tópikonan manera entre otro impuesto, adviescollege Dialooggroep Slavernijverleden, desaroyo sostenibel, ‘bijzondere uitkeringen’, agrikultura, Metananan Desaroyo Sostenibel, relashonnan statutario di e paisnan, desaroyo ekonómiko sosial i di finansa di e paisnan den Reino. Agènda di 2024 ta mustra ku lo trata e siguiente temanan: posishon finansiero i ekonómiko di e paisnan, vierlandenoverleg ku enfoke riba edukashon i seguridat, klima, digitalisashon i un tema ku a trata for di aña 2022 kual ta e artíkulo 73 VN-Handvest.

E konsulta interparlamentario di seis luna ta destiná komo un instrumento pa komunikashon direkto i enkuentronan personal entre e miembronan di parlamentonan di e 4 paisnan den Reino: Kòrsou, Aruba, Sint Maarten i Hulanda. Akuerdonan ku ta ser hasí ta keda presentá na e gabinete despues di e enkuentronan pa konseho.