Richard Doornbosch, presidente direktor di Banko Sentral.

BULLENBAAI—Dia pa dia e problemanan relashoná ku e kompania Caribbean Petroleum Refinery ta birando mas grandi. Apart di tabatin dokumentashon falsifiká den presentashon riba prueba di fondo, awor ta sali na kla ku RdK a permití CRU envolví su mes den un transakshon internashonal sin e lisensia OFAC.

Manera publiká den Vigilante Patrick Newton, aparte di ta miembro den Hunta di Supervishon/ Komisariado na Banko Sentral, e ta alabes direktor di Refineria di Kòrsou, RdK. E problema a inisiá na momento ku e kompania registrá na Panama, United Petroleo Corporation (UPC), a risibi un pago di debe, mediante entrega di derivado foi krudo prosedente di Venezuela. Den e transakshon aki, e kompanianan di Kòrsou Caribbean Petroleum Refinery (CPR) i Curaçao Refinery Utilites (CRU) a hunga un ròl logístiko pa lokual ta trata e transporte. Pa por outorisá e pago i transporte tuma luga, internashonalmente mester di un lisensia OFAC, ouspisiá pa Estádos Unídos. Te ainda, CPR, no por presentá e lisensia.

E dos kompanianan di Kòrsou, CPR i CRU a partisipá aktivamente den e proseso di saka i hiba e produkto (600 barí di fuel oil) for di Venezuela pa Bullenbaai, miéntras tabatin un transakshon di pago internashonal, ku te na e momentonan aki ta kuestioná si tabatin un lisensia. E ròl di Banko Sentral, CBCS, ta unu importante pa averiguá di kompanianan di Kòrsou tabata envolví i kon leu nan envolvimentu a yega.

Entre CRU BV i CPR BV  tin un akuerdo di servisio di almasen pa produktonan petrolero. E kontrakt a drenta na vigor entrante 2 di ougùstùs 2022. E kontrakt su kontenido ta regardá pa CPR uza fasilidatnan di Bullenbaai, via di CRU, pa depósito di krudo i derivado. Aparte di tabatin un kontrakt ku CRU, CPR tin un sup kontrakt tambe ku un kompania panameño, Knob Trading SA di Panamá. E kontrakt a drenta na vigor riba 24 di ougùstùs 2022.

E kompania, UPC di Panamá, a risibi un pago di debe mediante derivado di krudo venezolano, den e kaso aki “fuel oil”. Segun e lista di karga, riba 17 di sèptèmber 2022 un kantidat di 496 mil barí di Fuel Oil a keda konsigna pa PDVSA pa karga e tènker Colon. (tuma nota ku e komunikado di RdK a menshoná 600 mil bar’i miéntras e lista di karga a mustra 496 mil bari). Pa por hiba e kargamentu Kòrsou, komo un kanselashon di debe venezolano, mester tabatin un lisensia di OFAC, of alo ménos un argumentashon di akaso no tabatin un lisensia.

Segun direktor di Refineria di Kòrsou, Patrick Newton, te asina leu ku nan tabata sa, e kargamentu tabatin un lisensia di OFAC. En realidat esei no tabata e kaso i netamente e ousensia di un lisensia por komprometé Banko Sentral, den sentido ku Patrick Newton ta un komisario na Banko Sentral. Segun e struktura logístiko ku CPR di Kòrsou a traha kuné, tabata Knob Trading SA mester a perkurá pa dokumentashon legal miéntras UPC tabata esun kende a risibi e fuel oil komo repago di un debe ku PDVSA tin na UPC. Den e struktura logístiko pa Colon por a entrega e fuel oil den tankinan di Bullenbaai, mester tabatin un lisensia di OFAC, kual ta entidat estado unidense riba kòntròl di transakshonnan riba aktivonan ekonómiko finansiero.

Pero awor tin duda si en bèrdat tabatin un lisensia di OFAC. Riba 18 di novèmber, e bufete di abogado na Miami, riba súplika di Caribbean Refinery a entrega un konseho di e kargamentu di fuel oil na Kòrsou na sèptèmber último, tabata kontra di sanshonnan imponé pa gobièrnu estado unidense i OFAC. Mester puntra ta dikon, CPR a manda pidi un konseho miéntras Newton di Kòrsou a konfirmá na sèptèmber ku tin un lisensia di OFAC pa entrega e fuel oil na Bullenbaai. Tur esakinan ta indikashon ku kisas grupo Giusti, no ta dirèkt interesá pa drai e refineria sino mas bien ta trahando riba un struktura internashonal pa uza Bullenbaai i gana sèn. E ponensha aki por tin sosten tambe mirando ku den e proseso a manda dokumentashon falsifiká riba presensha di fondo. Vigilante a trata na drenta den kontakto ku Banko Sentral, sin eksito.