Willemstad,– “Pa loke ta e medidanan mes, gobièrnu a tuma e desishon despues di evaluá den e tim stratégiko, ku ainda no tin motibu pa eskalá e medidanan i tampoko pa de-eskalá esakinan, pues nan ta keda vigente te 21 di desèmber próksimo i den fin di siman ku ta bini, lo bolbe evaluá e medidanan i e desaroyonan di e sifranan kon e resultadonan ta bai ta i pa dia 21 di desèmber próksimo lo komuniká na komunidat kiko nos por spera”, na palabra prome mibister señor Eugene Rhuggenaath.

E ta splika ku lokual ta pasa ta ku e mester ta sinsero si i pa bisa ku e punto di salida na e momentunan aki ta ku nos ta bai pasa e dianan di fiesta bou di e mesun kondishonnan i reglanan.

E ta bisa ku gobièrnu debidamente tin oido pa stakeholdernan, komersiantenan i gruponan di interes ku ta wòrdu impaktá pa e medidanan aki, pero ku tur desishon ku tuma ta wak e balansa, teniendo kuenta promé ku e aspekto médiko, e impakto sosio ekonómiko i impakto sosial, impakto riba nos famianan.

Señor Rhuggenaath ta sigui bisa ku e deseo ta keda pa por sera aña di e manera mas plasentero, bou di e normal nobo aki, pero echo ta ku pa aworakí mester keda ku e medidanan aki manera nan ta pa a largo plaso kuida bida di hende i hasi adaptashonnan pa ku e normal nobo aki pa por bai na habri bèk i sostené un kresementu ekonómiko.

“E meta prinsipal aworakí ta keda baha e kantidat di kasonan pa dia i ta bai na hasi esfuerso pa aktualisá tambe e total kasonan aktivo ounke ku esei no ta e indikadó prinsipal”, asina promé minister a bisa durante rueda di prensa. El a splika ku mester keda papia ku e sektor di kuido pa sòru pa tin kuido regular, pero tambe ta sigui den kontakto ku doñonan di trabou pa sòru pa seguridat pa loke ta Covid 19 na boka di trabou kaminda ainda transmishonnan ta tuma lugá.