AMSTERDAM/BRUSSEL—Si Hulanda mester disidí Ukraina lo no bira miembro di Union Oropeo den 2030.

Rutte no ta di akuerdo ku e fecha, segun el a bisa den kumbre di Union Oropeo. No ta asuntu ki dia paisnan ta kla pa esaki, sino si e paisnan ta kla. Den Union Oropeo a lanta e diskushon riba mas ampliashon. Ukraina, Moldavia, Georgia i 6 pais riba west Balkan kier bira miembro di Union Oropeo. Anteriormente e presidente di Konseho Oropeo, Chrales Michel, a bisa ku e kier pa Ukraina bira miebro den 2030. Union Oropeo kier evita ku Rusia i tambe China amplia nan influensia den Oropa, i miembresia ta un manera pa evita esaki. Segun lidernan di Union Oropeo miembresia di e paisnan menshoná ta un proseso difisil. Asina estado di derecho mester ta na ordu. Esaki ta nifiká ku nan mester kumpli ku míles di kondishon pa bira miembro, segun Rutte. Segun Rutte no mester hasi konseshon riba e miles di kondishonnan. Banda di kumplimentu ku reglanan, Union Oropeo no ta kla pa permiti paisnan nobo. Union Oropeo tin 27 pais miembro kaba i si bini mas aserka tomo di desishon i otro asuntunan ta bira mas kompliká, segun Rutte. Awe e lidernan di Union Oropeo ta reuni riba posibel reformanan ku mester hasi tomo di desishon mas fasil den Union Oropeo. Rutte ta menshoná kiko e konsekuensianan ta di asepta mas pais. Esaki sigur ta importante pa e kontribushon ku miebronan aktual mester paga.