WILLEMSTAD – E konsehero di gobièrnu Stichting Bureau Toezicht en Normering Overheidsentiteiten (SBTNO) a risibí e proposishon di dividendo relashoná ku e kuentanan anual di añanan 2019 pa 2021 di Aqualectra, konosí tambe komo Integrated Utility Holding N.V. pa evaluashon serka Konseho di Ministernan. SBTNO a analisá tantu e maneho komo e proposishon te den detaye i a aprobá esaki.

Na aprel 2020 SBTNO a formulá guianan i prinsipionan spesífiko den un konseho, relashoná ku e maneho di dividendo i e normanan di balansa di Aqualectra. Esakinan ta inkluí kondishonnan manera basa dividendo riba un kuenta anual kontrolá, kubri dividendo ku reservanan liber pa disponé di dje, i mantené e ratio di likides i solvabilidat mínimo. Tantu Ministerio di Finansa komo SBTNO mes a konstatá ku Aqualectra a kumpli ku e guianan akí den su kuentanan anual di 2019 pa 202.

Segun e lei di corporate governance e minister responsabel, den e kaso akó e Minister di Desaroyo Ekonómiko, mester manda e intenshon di estalbesé o modifiká e maneho di dividendo di Aqualectra pa SBTNO por eskrito i bon motivá. SBTNO despues di konsultá dokumentunan relevante manera e desishon di Konseho di Ministernan, e konseho di Ministerio di Finansa, e kuentanan anual di Aqualectra, i otro dokumentunan legal, a konstatá ku no tin opheshon fuerte kontra e maneho di dividendo ni e proposishon di Aqualectra pa e aña finansiario 2019-2021.

Ministerio di Finansa den su konseho di 18 di ougùstùs último, ta enfatisá e resultadonan finansiero positivo di Aqualectra durante e periodo 2019-2021. Apesar di algun reto manera e impakto di pandemia di COVID-19 riba e demanda di awa i koriente, Aqualectra a logra ganashinan sólido, resultando den un mihó posishon di kapital di e empresa.

E Ministerio ta alegá sinembargo ku segun artíkulo 25 insiso 3 di e statutonan di Integrated Utility Holding N.V., ainda no ta posibel pa duna dividendo na e akshonista debí di pèrdida akumulá den pasado. Aqualectra a konfirmá den un karta di 24 di novèmber último ku nan ta sostené e konseho di Ministerio di Finansa i ku un repartishon di dividendo aktualmente no ta realisabel debí di e pèrdida akumulá menshoná.

SBTNO ta konkluí ku tin akuerdo entre Aqualectra i Ministerio di Finansa relashoná ku e maneho di dividendo i e repartishon di dividendo pa e aña finansiario 2019 pa 2021. E órgano di konseho no tin opheshon pisá i ta enfatisá den un konseho resien, e importansia di notifiká e normanan di balansa i maneho di dividendo pa e aña finansiario 2022 pa 2024 na tempu.

Resultadonan

SBTNO den su konseho resien ta menshoná e resultadonan finansiero positivo ku Ministerio di Finansa ta enfatisá riba dje. E kompania a raportá un ganashi nèto di 20 mion florin na 2019, 25 mion na 2020 i 22 mion na 2021. Aktualmente no ta realisabel pa repartí dividendo debí na e pèrdida akumulá segun artíkulo 25 insiso 3 dje statutonan i SBTNO ta menshoná den su konseho ku e pèrdida akumulá ta suma 15 mion florin.