Nicolas Maduro, presidente venezolano, kende a duna deklarashonnan kontra OEA.

CARACAS – E presidente venezolano, Nicolas Maduro, a akusá e Organisashon di Estadonan Amerikano, OEA, di a respaldá tur e invashonnan i gòlpinan di estado ku a keda realisá den e último añanan kontra gobièrnu nan di pais nan di Latino Amérika i Karibe.

Segun Maduro, OEA ta den ruina i e ruina nan aki mester disparsé. Kisas esaki mester keda komo un museo di maldat, sinismo i intervenshonismo, loke nan a para p’e pa e último 70 añanan den Latino Amérika i Karibe.

E mandatario a kritiká e aktuashon di OEA kontra gobièrnu nan di paisnan manera entre otro Bolivia, Hondúras, Brasil i Paraguay. El a sigurá ku Venezuela no tin intenshon di bolbe na e organismo aki, na kua el a presentá e solisitut forma di retiro na 2017.

Dia 17 di aprel tras di lomba, e presidente di Colombia, Gustavo Petro, a proponé OEA, ku sede na Washington, pa bolbe traha un karta fundashonal di e organismo i reintegrá Venezuela na esaki.

E situashon di Venezuela den OEA ta kompleho i apesar ku e gobièrnu di Maduro a presentá na 2017 un solisitut formal pa retirá for di e nashon di e organismo, for di 2019 te ku algun luna pasá, e puesto di e pais a keda okupá pa un persona mandá pa e opositor, Juan Guaidó.

E sekretario general di e instansia aki, Luis Almagro, a sigurá den Asamblea General di OEA na Perú, na luna di òktober tras di lomba, ku e salida di Venezuela for di e organismo nunka no a keda konkretá paso Venezuela no ta pareu ku nan obligashonnan pa ku e organismo.