E abogado a splika korte kasi 1 ora largu pakiko no por sera su kliente, Mariens Mariano, den e kaso di 600 kilo.

Nieuwe Haven,– Riba djabièrnè abogado Athena Sulvaran a tuma su tempu pa splika korte di apelashon ku e deklarashon nan di e testigunan ta redu. Ta trata di e kaso di e robo di 600 kilo ku a tuma lugá na òktober 2018.

Remarkabel den e kaso aki ta di nota e kantidat di testigu anónimo tin den e kasonan. E testigunan a wòrdu anonimisá na hues komisario komo ku e testigunan tin menasa riba nan bida.Tantu e testigunan anónimo komo testigunan kaminda nan informashon ta konosí lo a deklará diferente echo indikando ku Mariens Mariano lo ta persona tras di e ladronisia den warda di polis na Rio Canario. Ta asina ku testigu anónimo A21 a deklará na outoridatnan ku Mariano huntu ku gèng Army lo ta embolbí den e kaso di ladronisia. “Mariano a keda enkargá pa regla un bùs i e akusado lo a kumpra dos telefòn. E telefòn nan aki a wòrdu usá pa “app” kun’é i no pa bèl kun’é.

Un otro testigu ku fam S. lo a splika outoridatnan ku D. a bisami ku ta Mariens di Ser’i Kandela ta tras die  ladronisia di e droga na warda di polis. E testigu S. a bisa tambe ku e informashon di D. ta korekto komo ku e yu di D. lo tabata tin un relashon ku un dje personanan embolbí den un otro kasi di importashon di droga.

Apesar di e kantidat di deklarashon nan di testigunan anónimo i no anónimo abogado Sulvaran a indiká ku e fuentenan ku tur e testigunan a usa ta abase di redu i rumor. Alabes un testigu ku su informashon si ta konosí a indiká ku e tin tres fuente. E fuentenan ta inkluí un persona ku a fayesé, e èks polis Mariano mes, kende ta ningando tur akusashon i informashon di riba kaya. Segun Sulvaran, un testigu asin’aki nunka no por wòrdu aseptá komo prueba kontra di su kliente, Mariens Mariano.

Mas aleu, e defensa di Mariano, a splika korte ku por sera Mariano usando dos manera. Sea ta sera Mariano usando testigunan ku a usa redu anónimo òf ta sera Mariano usando testigunan ku a atmití di usa redu komo fuente di deklarashon.

Aktualmente e èks polis, Mariens Mariano ta sintando un kastigu pa otro echonan penal, kual ta inkluí importashon di 340 kilo di kokaina via di playa di Fuik i malversashon di su arma di trabou den periodo ku e tabata traha komo agente polisial den “wijkteam Otrobanda”. Pa e echonan aki Mariens a keda kondená na un kastigu di 6 aña kaminda korte a dikta pa e ladronisia di 600 kilo e èks polis no por wòrdu kondená.

Aktualmente tin un demanda di 8 aña ta kologá riba lomba di Mariens Mariano relashoná ku e ladronisia den warda di polis. Ministerio Públiko ta opiná ku Mariano ta e persona ku a kordiná henter e ladronisia, pero e akusado mes a desmentí su embolbimentu.

Aktualmente e korte ta planiá pa duna nan veredikto riba 15 di mart, pero riba 6 mart korte lo tene na último dia di tratamentu komo ku ta un kaso basta kompliká.

Na momentu ku Mariens Mariano por a duna su último palabra, e akusado a splika ku e no ta bai hasi uso mas di su derechi pa keda ketu i tin kos ku e tinku bisa den sala di korte. Segun e akusado e ta sintá dilanti korte riba e simpel echo di mal uso di poder den KPC. Mas aleu, debí na mal uso di poder bou di agentenan polisial el a pèrdè konfiansa den e sistema hudisial. Ademas, Mariano a splika ku komo èks polis el a nota kon reshèrshinan mes ta krea prueba i ku deklarashon nan ta wòrdu hasí despues ku testigunan risibí un kompensashon. Alabes, tur dia di nobo prosès ferbalnan ta wòrdu trahá kual simplemente no ta konta e bèrdat. “Pa evitá ku e palabranan ku mi usa ta wòrdu usá komo prueba kontra dimi, mi a opta pa keda ketu den sala di korte”. “Mi no a usa mi derechi pa keda ketu pa skonde kos, mi a usa e derechi pasó mi no tin nada pa skondé”, Mariano a splika tribunal di apelashon riba djabièrnu último.

Tambe Mariano a splika e opinion públiko den e ladronisia di 600 kilo. “E mesun pueblo ku a wòrdu di shòk na momentu ku tabata tin e ladronisia di droga den Rio Canario, aktualmente ta hañ’é apsurdo kon un polis ku tabata traha riba kaya ta sintá den korte di apelashon”. “Mi tabata un agente ku ta traha riba kaya den e “wijkteam” di Otrobanda, pues nunka ami no a yega di bai mes den e área ku e droga tabata na Rio Canario”.

Finalmente Mariens Mariano a indiká na e huesnan ku e ta komprondé e preshon pa solushoná e kaso aki, pero serando ami e kaso aki lo no òrdu solushoná.