UTRECHT—Sindikatonan FNV i CNV ta entama un kaso pa forsa un kompensashon pa personal di kuido ku ta malu ku long covid.

Gobièrnu ta ninga te ainda pa duna yudansa na personal di kuido ku ta den nesesidat finansiero urgente, segun e sindikatonan. Alrededor di 1000 trahadó ku a pèrdè nan trabou pa motibu di kehonan di corona duradero. Pa kompensa e pèrdida nan mester haña un suma di 22.839 euro segun e sindikatonan. E suma aki a keda otorga na personal ku un otro malesa manera esnan ku problema di pulmon of kanser. Mas aleu e sindikatonan kier pa gabinete indika un instansha denter di 4 siman, por ehèmpel UWV, ku por duna e adelantonan. Gobièrnu tin obligashon no solamente moral, pero tambe huridiko pa duna e kompensashon finansiero riba termino korto. For di komienso di pandemia tin kombersashonnan entre ministerio di Salubridat i sindikatonan riba e kompensashon. No tin resultado konkreto di e kombersashon. E organisashonnan den sektor di kuido ta envolví den e kombersashonnan pero no ta envolví direktamente den e huisio sumario di e sindikatonan. E personal di kuido na komienso di e krisis mester a sigui traha sin material di protekshon, manera tapaboka. Despues a resultá ku tabatin atvertensia pero ku no a tuma medidanan na tempu. E ministerio di Salubridat no a reakshoná riba e kaso huridiko. E ministerio tin deseo pa yega na un regla ku e sektor.