DEN HAAG—E sosten ku KLM a haña den krísis di Corona di gabinete hulandes, a keda aprobá inhustamente pa Komishon Oropeo.

E hues Oropeo, Hof di Hustisia a deklará e aprobashon nulo. E kaso a keda entama pa Ryanair ku ta di opinion ku tin kompetensha inhustu. Ta di dos biaha ku Hof ta rechasa e aprobashon di Komishon Oropeo. Algun aña pasa meskos a sosode ora Komishon Oropeo pa promé biaha a duna aprobashon na e pakete di sosten di gabinete. Na komienso di e krisis di corona den 2020, tabata parse ku KLM lo a haña problemanan finansiero pasobra tabatin poko vuelo. Gabinete a duna 3,4 miar euro di sosten di estado na e kompania den forma di fiansanan i garantia. Komishon Oropeo a duna aprobashon pa e sosten, pero djis despues, den 2021, el a keda revoká pa hues Oropeo. E aprobashon no tabata sufisiente argumenta segun hof. Seguidamente e Komishon a adapta un ke otro i a bini un aprobashon nobo pa e sosten. Esun aki tambe a keda revoka den korte ku e desishon aki. Segun hues no ta kla si KLM só lo a usa e sosten pasobra e kompania ta partner di Air France. Segun un bosero di Hof Oropeo esaki no ta fin di e saga; e Komishon ainda tin e oportunidat pa bai den apelashon den e kaso i por tuma un desishon nobo riba e sosten. KLM lo studia e veredikto i investigá pasonan próksimo. E veredikto no ta nifiká ku KLM mester bai paga algu. E kompania a hasi uso di garantia di gobièrnu, pero e fiansa nan a paga bèk kaba. KLM no ta e promé kompania ku hues Oropeo a deklara sosten inkorekto. Fin di 2023 Hof Oropeo a dikta ku Air France a haña sosten inhustamente di gobiernu franses. Ta trata di 11 miar euro. Pa Lufthansa tambe Hof Oropeo a determiná ku e sosten no ta hustifiká. Den tur tres kaso Ryanair tabata esun ku a entama e kasonan.