LAR: petishon LAR riba eksonerashon 2017 pendiente desishon den korte.

Nieuwe Haven—Un otro aspekto riba e problemátika di impuesto tumando lugá e dianan aki, ta e súplika mediante dekreto di LOB pa atkerí informashon riba e motibu i proseder di Ministerio di Finansa pa eksonerashon 2017.

Na Yüni 2023, Un konsultorio fiskalista renombrá na Kòrsou, a hasi un petishon mediante e dekreto LOB, pa risibi mas informashon riba eksonerashon di impuesto 2017. Esaki ta lokual fuentenan den seno di e ministerio di Planifikashon i Organisashon a señalá na Vigilante. Mediante e dekreto di LOB, Dekreto Nashonal Riba Transparensha di Maneho, gobièrnu di Kòrsou ta obligá na entrega detayenan regradando e desishon di maneho na Ontvanger riba eksonerashon di impuesto.  E petishon pa mas klaridat ta un proseder lógiko di parti di e konsultorio, mirando e nesesidat di mas informashon pa alabes suministrá nan klientenan ku ta puntrando. E problema ta bira, kiko e ministerio di Planifikashon i Organisashon ta bai duna komo kontesta despues di konsulta ku Ontvanger di Kòrsou. Despues di a entrega e petishon, no a bini niun kontesta. Tantu e Ministerio di Planifikashon komo un di Finansas Públiko a keda sin entregá un kontesta. Konsekuentemente, na Ougùstùs último, e ofisina di konsultorio a emití un proseso atministrativo mediante korte di LAR pa obligá korte instruí gobièrnu na duna un kontesta. Riba e petishon aki, ainda Korte LAR no a duna un kontesta i e petishon ta kologando.

Minister Silvania a splika parlamento ampliamente riba e desishon. Segun Javier Silvania, Ontvanger ta “focus” riba kobransa di debenan di 2018 bai ariba. E maneho  ta enserá ku aanslagen di 2017 òf mas bieu lo no wòrdu kobrá aktivamente. No ta enserá ku a duna abolishon (“kwijtschelding”), pero ku Servisio di Impuesto ta konsentrá nan kapasidat limitá pa kobra aanslagnan mas yòn ku posibilidat mas haltu di kobransa. Segun Silvania, pa evitá ku e debenan di impuesto ta bolbe bira bieu i komo resultado insiguridat pa loke ta trata e kobransa di esakinan, Servisio di Impuesto a fihá diferente meta ku tin komo meta pa e organisashon kuminsá traha den aktualidat i mehorá e kalidat di servisio.

Segun Silvania, nan análisis interno a konstatá ku 90 % di entradanan di impuesto i primanan soshal tin di haber ku aangiften/aanslagen di máksimo 5 aña bieu (esaki ta kuadra ku investigashonnan internashonal di OECD). P’esei e la bisa ku no ta efektivo pa hinka kapasidat limitá den purba kobra debenan di mas ku 5 aña bieu. Pa redusí e kantidat di aanslag na un nivel manehabel i responsabel di moda ku belastingdienst por traha den aktualidat, Ontvanger a adaptá su maneho di kobransa. Esaki ta lokual Javier Silvania a presente den parlamento. Konsultorionan Fiskalista ta puntrando pa mas informashon riba e kambionan na Ontvanger for di kual unu a inisiá un proseso den korte.