AMSTERDAM—Kolegio disiplinario regional di Salubridat na Amsterdam a suspendé un enfermera (73) independiente pa 6 luna pa aseptá hernesia di un pashènt.

Aseptashon di un herensia di un pashènt ta kontra kodigo profeshonal di enfermeronan i personal den kuido. E enfermera tabata kuida un dama di 2018 pa 2021 den su propio kas, despues ku e pashènt a bai kas bek for di un kas di kuido kaminda e tabata rekuperá di un kaida. E enfermera tabata bishita e dama dos biaha pa dia. E dama no tabatin famia i poko amigu. Den 2019 e pashènt ku despues di un aña a kuminsá haña síntomanan di demensia, a pone den su testament ku e ta laga mitar di su herensia pa e enfermera. Pero e kodigo profeshonal di enfermeria ta determiná ku un enfermera no por tuma regalo ni nada otro ku no ta mas ku simboliko di un pashènt. Salubridat/kuido na kas den Hulanda ta di tal manera ku enfermeronan por traha sin supervishon na kas di kliente. Awendia hopi pashent i grandinan ta biba mas largu na kas. Esaki por solamente si pashentnan por konfia kompleto den e personal di kuido. Un kaso manera esaki ta mina konfiansa, segun e kolegio disiplinario. E kolegio ta kuestioná e enfermera ku nunka antes tabatin un keho kontra dje den su karera di dekada, pasobra e no a mustra ku el a faya. Tampoko e no a koperá ku e investigashon. E kuestion di e herensia mes ainda no ta kla.