Segun e reklamonan, no ta eksagerashon sino tin bastante mal servisio

Punda—Ofisina di Turismo na Kòrsou tin un problema grandi ku e merkado di turismo for di Venezuela. Embahada Hulandes, responsabel pa otorgá visa na turistanan venezolano, no ta koperando. Un kantidat di 200 visa so por sali mensual pa islanan ABC i Hulanda. Esei no ta sufisiente pa un konekshon aéreo entre e paisnan.

Te ku siman pasá ainda konsulado no a habri sita pa por apliká pa bisa pa ougùstùs. Turistanan ku tabata buska visa pa drenta Kòrsou na Ougùstùs òf Sèptèmber, no por a logra haña ni sikiera un sita. Vigilante tin korespondensha unda ta konfirmá ku agensianan di biahe a kuminsá desviá nan klientenan kaba pa otro destinashon den Karibe. E situashon ta bastante desesperá i ta peligrá e konekshon aéreo entre Venezuela i Kòrsou, pasobra simplemente no tin pasahero pa yena e buelonan. Tur esakinan ta tumando lugá, miéntras minister di Asuntunan Ekonómiko, Ruisandro Cijntje tin un tour planeá na Venezuela pa promoshon di Kòrsou.

Segun e reklamonan, no ta eksagerashon sino tin bastante mal servisio na embahada hulandes pa lokual ta trata e visanan pa turistanan venezolano. Tur dia tin problema pa petishon i proseder pa un visa. Unu di e agensianan di biahe, por ehèmpel tabatin reservashon pa Sandals na Santa Barbara. Tabata trata di un reservashon pa 3 kamber pa 10 dia di estadia. Debi na un tardando den visa, e klientenan a súplika pa kambia nan vakashon pa Punta Cana, Repúblika Dominikana. Segun e klientenan, ya ta konosí ku e servisio di visa ta malisimo i ta tuma mas ku 21 dia promé bo risibi un kontesta, pa kual ta informá ku tin 200 kupo so pa luna.