Promé Minister Mark Rutte a diskulpá  publikamente na desèmber último.

AMSTERDAM/WILLEMSTAD – Tweede Kamer ayera a debatí tokante e despensa di gobièrnu hulandes pa e pasado di sklabitut. Promé Minister Mark Rutte a diskulpá na desèmber públiko. Algun miembro di e Parlamento hulandes tabata kontentu ku esaki, miéntras ku otronan tabatin hopi krítika di por ehèmpel e manera purá i sin táktika ku a yega na e diskulpa. Algun no tabata haña e diskulpa nesesario mes.

Un motivashon prinsipal pa e diskulpa ta un rapòrt titulá ‘Ketenen van het verleden’ dje kolegio di konseho ‘Adviesvollege Dialooggroep Slavernijverleden’ publiká for di 2021. Un dje rekomendashonnan den e rapòrt ta pa ankra e diskulpa den un lei. Rutte no ke a bisa luna pasá ainda si su gabinete ta dispuesto na hasi esaki. Den e rapòrt a para ketu tambe na e momentu i e forma dje diskulpa. Segun e kolegio lo ta bon pa Rei hasi esaki dia 1 di yüli awó. Riba e dia ei ta 160 aña pasá ku gobièrnu hulandes a abolí sklabitut i ta 150 aña pasá ku liberá e último katibu berdaderamente.

Rutte a pidi su diskulpa for di desèmber, teniendo kuenta ku e aña akí ta e aña konmemorativo. Rei Willem-Alexander lo ta presente na e konmemorashon dia 1 di yüli na Amsterdam. Pero no ta konosí ainda si e lo ripití e diskulpa di gobièrnu. Promé Minister Rutte, Minister di Asuntunan Interno i Relashonnan di Reino Hanke Brions Slot i Minister di Enseñansa, Kultura i Siensia Robbert Dijkgraaf tabata presente na e debate, na nòmber dje gabinete hulandes.

Banda di diskulpa gobièrnu a anunsiá ku lo bin un fondo di drèmpel abou i ampliamente aksesibel, ku e ophetivo pa enfrentá e pasado di sklabitut transatlántiko, ku 200 mion euro aden i e lo ta ankrá den lei. Asina Rutte a bisa den su diskurso na desèmber. Por ehèmpel lo finansiá un areglo temporal, pa laga desendientenan di personan sklabisá kambia nan fam kolonial gratuitamente.

Rutte anteriormente: “Gobièrnu ya ta trahando di diferente forma riba un sosiedat den kua tur hende tin e mesun oportunidatnan i ta risibí trato igual. Ya nos a menshoná e lucha kontra deskriminashon i rasismo den komunidat kompleto. Den e akuerdo di koalishon tambe nos a marka e pasado i futuro kompartí den Reino i e kompromiso ku igualdat denter di Reino. Lo bin un fondo di drèmpel abou i ampliamente aksesibel, ku e ophetivo pa enfrentá historia di sklabitut transatlántiko, ku un tamaño di 200 mion euro i ku lo ta ankrá den lei.”.