Tur representante ku a partisipá.

WILLEMSTAD – Pa di dos biaha e organisashon ku ta supervisá progreso di implementashon di e Paketenan Nashonal ku Hulanda a imponé riba e islanan, Tijdelijke Werkorganisatie (TWO), a organisá e asina yamá ‘Counterpartdagen’.

Resientemente durante tres dia representante di Aruba, Kòrsou, Sint Maarten i Hulanda a papia ku otro tokante e paketenan di pais i e areglo mutuo den Den Haag. E seshonnan tabata interaktivo i a duna oportunidat pa kompartí punto di bista i siña di otro, teniendo e diferensianan mutuo den konsiderashon. Liña kòrá durante e dianan tabata ‘krea sinergia’. Tambe tabatin oportunidat pa interkambiá di forma informal i a bishitá e eksposishon ‘Koloniaal Den Haag. Een onvoltooid verleden’.

Mènedjer di programa TWO Judith Jeurissen: Riba 4 di aprel 2023 Hulanda i e tres paisnan Karibense a firma e Areglo Mutuo ‘kolaborashon durante reforma’. Ta bunita pa mira kon e puntonan di salida sentral di e Areglo Mutuo, ‘propiedat’, ‘igualdat’, i ‘komunalidat’, ta bin bèk den e kalidat di e kòmbersashonnan ku nos a hiba. Hopi habrí i inspirativo. No ta nada si nos no ta di akuerdo ku otro tur ora, basta esaki ta sosodé ku rèspèt i un nesesidat fuerte pa skucha otro i komprondé otro. E komunalidat den e retonan ku nos ta enfrentá huntu pa ami tabata e ‘eye opener’ di e aña akí. Pa TWO esaki ta nifiká ku nos mester fasilitá e interkambio entre e kuater paisnan mas tantu ainda”.