DEN HAAG—Un aña pasa premier Rutte a ekspresá diskulpa pa pasado sklabitut den Archivo Nashonal na Den Haag.

El a pidi diskulpa pa e ròl ku estado hulandes a hunga den sklabitut. Ku e diskulpanan gabinete a pone un suma di 200 mion euro disponibel pa medidanan riba tereno di konsientisashon, envolvimentu i kontinuashon. Konkretamente tin algun medidanan riba mesa segun ministerio di Asuntunan Interior. E persona ku tin un fam ku ta referi na sklabitut por kambia esaki gratis entrante 2024. Aktualmente e ta kosta minimi 835 euro pa kambia fam i bou di kondishonnan stringente. Ademas despues di e diskulpa tabatin rehabilitashon di e heroe di Kòrsou Tula, ku a enkabesá un rebellion di katibunan. Dia 31 yanüari tin otro enkuentro entre organisashonnan envolvi i Rutte. Pero despues di resultado di elekshon na novèmber tin preokupashon bou di esnan envolví den komunidat. Nan ta teme ku e oumento di kantidat di asientonan di partidonan derechista den Tweede Kamer, e kombersashon riba sklabitut ta bolbe kai den retraso. Informadó Ronald Plasterk a konseha Tweede Kamer siman pasa ku partidonan PVV, VVD, NSC i BBB ta purba forma un koalishon.

Un otro opshon lógiko no tin segun Plasterk. E partidonan huntu ta bon pa 88 asiento. E partidonan tin diferenesianan riba e tema di sklabitut, segun nan programanan di akshon. Kolonialismo i pasado sklabitut ta meresé un lugá fihó den kurikulo di historia i kultura segun Omtzigt di NSC. PVV ta pensa otro: e odio iskierda den kua heroenan di nos historia ta keda burla, mester termina. Diskulpanan pa pasado sklabitut i akshonnan polisional maner hasi pa e rei, lo keda revoká, segun e programa di PVV. Den enseñansa ta duna alumnonan un sentimentu di berguensa riba e historia di nos pais, segun PVV. E dos otro partidonan BBB i VVD no tin puntonan konkreto den nan programa riba e tema, pero BBB si a papia di e tema. Komienso di 2023 lider Van der Plas a bisa den un debate ku ta korekto ku estado a pidi diskulpa. Pero di otro banda e no ta mira sentido di instala un fondo. Lider di VVD Yesilgöz a hasi yamada dia 1 yüli durante Keti Koti pa sigui papia riba e tema. Bou di e gabinete saliente tabatin konsenso ku mester hasi algu, segun Morishaw, presidente di organo konsultativo di hulandesnan karibense (CAN). E ta indiká ku por ehempel tin mas fondo pa investigashon riba e impakto di sklabitut. Pero e ta mira tambe diferente grupo den komunidat ku no ta positivo riba diskulpa i antirasismo, loke ta preokupante. Nos ta teme ku e sosten ta disminui. Morishaw ta mustra riba e kuestion rondo di kordinadó nashonal kontra diskriminashon i rasismo. E funshon ta okupá for di 2021 pa Rabin Baldewsingh, un eks-diputado di Den Haag. Siman pasa Baldewsingh a presenta un programa ku 29 palabrashon ku gabinete. Den e pakete ta papia di entre otro atenshon pa sklabitut den enseñansa i instalashon di un komite ku mester disidi pa dekreta 1 yüli komo dia nashonal di konmemorashon. Pero si ta PVV mester disidi e kordinadó mester buska otro trabou. Baldewsingh ta preokupá ku kresementu di partidonan derechista, hopi di logronan di e kordinadó ta bou di preshon. Dagmar Oudshoorn, eks-presidente di kolegio di konseho Dialooggroep pasado sklabitut ta rekonose ku a logra pasonan for di 2023. Ainda mester hasi hopi riba tereno di rehabilitashon. Ta trata di entre otro di bringa pa oportunidatnan igual riba merkado laboral. Oudshoorn tin miedu ku e kombersashon lo para den e panorama politiko nobo.