WILLEMSTAD,—-Esaki ta e lema di “Fundashon Birgen di Rosario”,”Yuda nos kuida esnan ku a kuida nos”. Dia 26 di ougùstùs próksimo ta bai tin un gran fundraising, pa rekoudá fondo pa Fundashon Birgen di Rosario.

Ta trata aki di un konsierto bailabel ku partisipashon direktamente for di Colombia “Grupo Galé”, Son CC i DJ Carlito. “Fundashon Birgen di Rosario”,ta un organisashon ku ya pa 80 aña ta duna kuido den tur forma na nos hendenan grandi. E fundashon ta konsistí di 5 kas, kual nan ta Richardus-huis, Nos Lanterno, Habaai, Klooster Alverna i tambe Pasadia Mi Amparo.

En total ta duna kuido na mas ku 400 hende grandi, ku ta kantidat konsiderabel. Na “Fundashon Birgen di Rosario”, tin 250 trahadó ta laborá, kada un ta un profeshonal riba su tereno. Manera hopi fundashon, “Fundashon Birgen di Rosario”, ta ser finansiá dor di gobièrnu. E situashon ku pais Kòrsou ta pasa aden tin komo konsekuensia ku gobièrnu aña den aña afó ta kòrta den supsidio. Esaki ta pone ku e fundashon no por keda sinta man krusá i ta keda bati na porta di gobièrnu. E meta di e fundraising aki ta pa yuda e fundashon ku tin hopi nesesidat. Ku e ganashi “Fundashon Birgen di Rosario”, ta deseá na kumpra materialnan i aparatonan di uzo ku ta sumamente nesesario pa sigui duna e kuido na e hende grandi.

Dia pa dia e hende grandi tin nesesidat di mas kuido; nan tin mester di stul pa baña, ròlstul, left pa saka nan for di kama i pone nan bèk den kama, rollator, etsetera. Tur esaki ta kosta hopi sèn. Ku kompra di e materialnan nesesario pa nos grandinan, sigur ta aliviá e trabou di e personal. E personal ta duna kuido ku amor, apesar ku esaki ta birando hopi pisá. “Fundashon Birgen di Rosario”, no solamente ta enfoká riba kuido di nos grandinan, pero tambe ke mehorá nan kalidat di bida. Ta importante pa remarká ku Grupo Galé, ku ta bini direktamente for di Colombia, ta koperá tremendamente ku e organisashon pa hasi e evento aki posibel.

Grupo Galé ta hopi gustá bou di amantenan di salsa. Esaki ta un tremendo oportunidat pa baila e kantikanan tan gustá, den un ambiente amigabel. E evento ta tuma lugá djasabra dia 26 di ougùstùs, 8or di anochi pa 2or di mardugá, na La Hacienda Olivia. Pa informashon di VIP por yama 561-0222. Karchi ta optenibel na tur nos kasnan di kuido; Huize Welgelegen (Habaai), Nos Lanterno, Richardushuis i Klooster Alverna, Mensing’s Caminada i 24 uur uit de muur. Un danki spesial ta bai na Licores Maduro, Mangusa Supermarket, Radio Hoyer, Radio Mas, TV Direct, 24 uur uit de muur pa hasi e evento aki posibel. Yuda nos kuida di esnan ku a kuida nos. Persona di kontakto “Fundashon Birgen” di Rosario: Jurina Constancia 561-022.