Ministerio Públiko a duna splikashon di vários punto positivo den nan relato anual.

Willemstad,– Den e relato anual di Ministerio Públiko, e organisashon a indiká ku kobransa di 1.8 mion tabata un desaroyo positivo pa OM pa e parti di kobransa di but

E relato anual di 2022 a keda publiká dor di Ministerio Públiko. Den e relato OM a indiká tres punto positivo ku a keda ehekutá den 2022. E punto prinsipal ta ku e departamentu di kobransa di but, Paga bo But(PBB) a realisá nan meta prinsipal di a kobra mas ku 1.5 mion florin na but. Den su totalidat, e departamentu a kobra alrededor di Fl 1.811.000,- .

Banda di kobransa di impuesto e PBB a invertí mas aktivo den informá e pueblo tokante vários posibilidat di pago di but i e diferente posibilidatnan pa drenta den un areglo di pago. “Tur aña di nobo un kampaña nobo di marketing ta keda implementá pa motivá e pueblo na paga nan but. Na 2022 e kampaña tabata “RILÈKS SIN STRÈS”. E kampaña na 2022 a enfatisá ku tur persona ku bandoná e isla pa bai fakansi, paga nan but promé òf pa drenta un areglo di pago”.

OM a logra di kobra 800 mil florin mas tantu den 2022, si kompará esaki ku 2021. Segun e relato anual di OM, e invershon pa informá pueblo i tuma kontakto mas aktivo ku hendenan ku but habrí, por ta e rason nan prinsipal dikon multa kobrá a oumentá den 2022. For di 2017butnan kobrá tabata bira ménos, pero 2022 ta e promé aña ku butnan kobrá a oumentá.

Otro stapnan den e bon direkshon ku Ministerio Públiko a logra ta e proyekto di “mediation” den e proseso penal. Durante e proseso di mediation, e akusado ku e víktima ta risibí e oportunidat pa sinta na mesa i kòmbersá tokante kon pa drecha e situashon lamentabel ku a sosodé. For di e kòmbersashon aki, ámbos persona lo sera un akuerdo di reparashon i den e akuerdo aki, OM lo trat’é den korte na momentu di tratamentu di e kaso.

Den 2023 diferente kaso di mediation lo kuminsá. E kasonan di mediation lo keda tratá dor di un organisashon independiente.