DEN HAAG—Inspekshon di Hustisia ta bai investigá kon organisashonnan hudisial a atende ku e sospechoso Jamel ku a mata un trahadó di Albert Heijn.

Inspekshon mester investigá kua organisashonnan tabata envolví den tratamentu i guia di e sospechoso. Un trahadó di AH a keda fatalmente hinká djaweps mainta na Albert Heijn den sentro di Den Haag. Jamel L (56) a hasi un petishon den aprel pa ondestant pa motibu di insufisiente entrada. Kasi dos siman pasá el a pidi un kaminda di keda. 13 yuni tabatin un kombersashon kune. Durante e diferente kontaktonan ku e sospechoso tabatin agreshon i intimidashon segun alkalde Zanen. E munisipio a registrá esaki den un sistema interno i a duna e informashon na polis. Debi na e insidentenan Jamel L no por a drenta edifisionan di munisipio inkluso stadhuis i otro kantornan. Segun e munisipio nan no tabata na altura unda e sospechoso tabata den e siman di e insidente fatal. E sospechoso tin un historia largu kriminal den Hulanda, Inglatera i Kòrsou. Den 2018 hues a impone tratamentu sikiatriko obligatorio na Korsou pero Hulanda a ninga di tuma e tratamentu. For di dokumentonan di korte na Korsou esaki probablemente no tabata posibel pa motibu di e gastunan. Komienso di luna Jamel L a haña kastigu den korte di Rotterdam pa menasa personal di munisipio den Rotterdam. E por a sali liber pasobra el a sinta e tempu den aresto preventivo. Korte a bisa ku no tabata na altura di e kastigu impone na Korsou.