GRONINGEN—E kranchi di gas na Groningen lo sera entrante 1 òktober 2023 pero e posnan di gas ta keda habrí pa un aña te 1 òktober 2024.

Esaki den kaso ku tin un winter hopi friu. Despues ta bini un fin definitivo na 60 aña di e sakamentu di gas for di tera den provinsia di Groningen. Sekretario di estado Vijlbrief di Mineria ta reakshona satisfecho riba e anunsia. Otro aña tin balor simboliko grandi pero pa e aña aki ya tur hende kier ku ta sero gas. Den 2024 ta basha beton den e pos. E problemanan i temblornan no ta disparse segun Vijlbrief. E problemanan pa e habitantenan no a solushoná i lamentablemente e temblornan lo sigui pero e fuente di tur problema ta sera entrante oktober. For di mart 2018 gabinete a anunsia ku ta bai stòp ku gas na Groningen pa motibu di seguridat di habitantenan di e teritorio menasa pa temblornan. E temblornan ta keda okashoná pa e pompmentu di gas for di tera i pa dekadanan ta soru pa hopi daño na kasnan i agrikultura. E siere definitive di e kranchi di gas i posnan di gas no tabata sigur. Den 2018 tabata pensa di un periodo di transishon di 12 aña te 2030 pasobra gabinete kier tabata sigur ku lo tin tin gas na bon preis pa winternan fuerte. Pero bou di preshon di Tweede Kamer i habitantenan di Groningen e fecha a delantá na 2022, loke no a alkansa. E guera na Ukraina a start i Rusia a para eksportashon di gas pa Oropa. Hulanda tabata teme pa problemanan di entrega i un desishon definitivo a keda pospone. Gabinete ta pone den un lei ku mester desmantelá e posnan pa 1 oktober 2024. Ainda no por pa motibu di e situashon internashonal insigur. Den situashonnan eksepshonal por pomp gas den kantidat limitá. Den provinsia di Groningen a reakshoná moderá riba e desishon di sera e kranchi di gas. Aktualmente ta saka 2,8 miar kubiko di gas pa aña. diputado Dekken (PvdA) ta bisa ku esaki no ta e seramentu definitivo pasobra ta laga 5 pos habrí den kaso di winter severo.