E dies kasonan aki a keda registrá den apénas un luna di e aña aktual.

CARACAS – Un total di dies kaso di violashon na derechi i libertat di ekspreshon a keda registrá na Venezuela den luna di yüli, un luna ku a keda marká pa hostigamentu i aktonan di sensura di parti funshonarionan i organismo di estado. Esaki segun loke a keda sigurá pa ONG Espasio Públiko.

Segun un nota di prensa di e organisashon, periodistanan i medionan di komunikashon tabata e víktimanan prinsipal di e violashonnan na libertat di ekspreshon den luna tras di lomba.

Den mesun rosea, a sigurá ku esaki nan a keda realisá pa tres institushon di e Estado, dos funshonario i un direktiva di medio.

Entre e víktimanan, segun a sigui indiká, tin tres medio di komunikashon, dos periodista/reportero i un partikular, kua aparentemente ta un siudadano indígena ku a keda intimidá pa un funshonario militar i obligá na pidi despensa pa un denunsia ku el a hasi di kimamentu di algun ekipo uzá pa mineria ilegal na e estado di Amazonas.

Tambe a menshoná ku den un protesta di e grupo LGBTI, dilanti e sede prinsipal di Fiskalia na Caracas, funshonarionan polisial a saka foto i intimidá aktivistanan ku tabata rechasá e detenshon resien, persekushon hudisial i eksposishon di 33 hòmber detené den un bar gay na nort di Venezuela.

Segun e informe di ONG, 217 violashon di libertat di ekspreshon a keda registrá na e nashon karibense durante e promé semèster di 2023. Ta trata aki di un promedio di atake di 1.2 pa dia.

Den aña 2022, a registrá 227 violashon na libertat di ekspreshon, un bahada di 7% kompará ku aña 2021.