ARNHEM—Den e bario Presikhaaf na Arnhem un kandela grandi a plama ayera mèrdia den 5 kas i 100 kas a keda evakuá.

Brantwer a logra domina e kandela te den oranan lat di anochi, pero ainda mester a kaba paga e kandela. Brantwer tabata na e sitio ku mas di 200 bombero ku tabata remplasa otro. E kousa di e kandela ainda no ta konosí. E kandela tabata difisil pa paga pasobra riba tur e daknan tabatin panelnan solar. Pa e motibu aki brantwer mester keda henter anochi pa kaba paga kandela. E kandela ta bou di e panelnan solar, p’esei ta ta difisil pa brantwer yega serka di e kandela. A kita parti di nan pero no por hasie kaminda e kasnan ku ta kima. Brantwer a start ayera nochi ku trabounan di demolishon ku a okashoná mas huma. Pasobra e bientu a boltu, a evakua 24 apartamento mas. Den oranan di merdia mester a evakua 100 kas. 4 persona a keda heridá den e kandela.

Nan a keda transporta pa hospital pa tratamentu. No tin informashon di nan kondishon. Esnan ku a keda evakua ku no por a keda serka famia, por a bai sporthal. A regla akomodashon pa esnan ku nan kasnan a kima. Pasobra brantwer mester  a keda te den oranan di anochi ku trabounan pa kaba paga kandela, a pidi habitantenan pa pasa anochi otro kaminda. Ta trata di un total di 16 kas. Habitantenan di e kasnan evakua por a bai kas bek den fase. Apesar di multiple alerta i atvertensianan di brantwer, servisionan di seguridat i alkalde Marcouch pa sera bentana ku portanan, hopi hende a keda wak e kandela den huma. Algun di nan a meldu despues ku kehonan serka ambulans. E kareda di kas ta konsisti di 8 kas di kua kandela a alkansá sigur 5. E sobra tres tin daño di huma i awa.