A risibí 117 aplikashon pa weganan di ‘Online Gambling’ direktamente via di portal i Gaming and Control Board a entregá 8 lisensia.

Willemstad, — Javier Silvania ta splika ku for di dia a habri e portal tres luna pasá, 117 petishon a drenta. Ademas, Gaming and Control Board ya a duna 8 lisensia kaba pa kompanian por operá den online gamling.

Javier Silvania a splika den sala di parlamento ku den e tres lunanan ku e portal ta habrí, a kuminsá risibí 117 aplikashon pa weganan di online gambling i pues esaki ta mustra kuantu petishon a drenta. Javier Silvania ta splika ku Gaming and Control Board a duna 8 lisensia. Esaki lo aportá ku 1 mion na kaha di gobièrnu direktamente, minister di finansa ta splika. Histórikamente nos no tin masha bon reputashon ku labamentu di plaka i kombatimentu di terorismo Javier Silvania ta splika. Operadónan tabata ópera sin kòntròl direkto di gobièrnu òf di Gaming Control Board. MinFin ta splika ku esaki ta sosodé miéntras ku leinan di labamentu di plaka no ta kubri e industria di online gambling sufisiente.

E lei nobo bou di ordenansa LOK si lo pone mas atenshon i kumpli ku leinan stándartnan internashonal. TrustUnie Curaçao tambe a duna di konosé anteriormente ku ordenansa nobo LOK mester mehorá e posishon internashonal di Kòrsou. TrustUnie Curaçao a hasi bishita na parlamento anteriormente pa asina duna konseho i informashon ku tin ku tene kuenta kuné. TrustUnie Curacao ta kompartí entre otro ku den rapòrt di Raad van Advies esaki ta duna di konosé ku Kòrsou a keda evaluá dor di Financial Action Task Force (FATF) na 2012. Esaki a resultá den investigashon di 5 aña i proseduranan pa asina kombatí labamentu di plaka i finansiamentu di terorismo.

FATF ta rekomendá pa sigui stándartnan internashonal i implementá esaki bou di ordenansa  nobo di LOK. Aktualmente ordenansa nobo LOK ta den desaroyo. E preokupashonnan di mas grandi di TrustUnie Curaçao  ta ku bou di e lei nobo kondishonnan ta hasi e industria ménos atraktivo pa operadónan den weganan di online gambling. Señor Rellum di TrustUnie Curaçao a indiká den reunion anterior ku e no ta deseá pa restrukturashon di e lei, pero mas bien pa un regulashon mas mió. Preokupashonnan tabata entre otro e gastunan di lisensia i rekisitunan di supstansha, kual ta enserá ku kada operadó lo mester tabatin un kantor i tambe un eksperto.

Pero e preokupashonnan a keda splika dor di minister Javier Silvania den sala di parlamento. Kondishonnan di lei LOK mester atraé operadónan pa kumpra lisensia aki na Kòrsou.