Willemstad,– Korte ayera a yega na un desishon den kaso asesinato Pampanostraat na Marie Pampoen. Hues a bai di akuerdo ku Ministerio Publiko.

Segun ministerio públiko un outopsia kondusí riba kurpa di Nathaniel Pastor, a konkluí ku e la bin fayesé despues di a risibí un kantidat di 3 perforashon di bala. Riba 29 di sèptèmber, 2022, Edion Lourens di 24 aña a los un kantidat di 8 tiru dirigí riba Pastor, den bario di Mari Pampun.

Ministerio Públiko ta kombensí ku Lourens konsientemente a plania e asesinato riba Lourens. E promé herida di bala a keda konstatá na e parti abou links den lomba di e víktima, entre e repchi 10 ku 11. E proyektil a pasa den kurpa di Pastor pasa via di su thorax entre repchi 3 i 4 i sali for di e kurpa.  E di dos herida di bala tambe a drenta na e parti règts mei mei den lomba sigui yega su thorax unda e la perforá e pulmon robes i kurason i sali di su pechu dilanti. Segun e patólogo e promé dos tirunan tur a penetrá e kurpa di patras di e lomba i subi bini ariba. E di tres tiru a drenta via di e heup dilanti i bai keda pegá den un múskulo patras abou den lomba di e víktima. Mas aleu a bin konstatá tambe dos skarmai di bala na e kurpa a konsekuensha di e tirunan ku Lourens a los riba su víktima.

Ta sospecha ku e di dos herida di bala e kondusí na morto di Pastor. E víktima a bin pèrdè hopi sanger despues di a risibí e bala nan, segun rapòrt di patólogo. A konstatá perforashon di kurason, perforashon di pulmon, un pulmon a kolèps, diferente fraktura debí na perforashon di bala entre nan repchi. Alrededor di 5 minüt pa 7’or di anochi dòkter a konstatá morto di Nathaniel Pastor di 27 aña. Tambe den e raport por mira ku a bin deskubrí un kantidat di 6 huls kaliber 9 x 19 cm riba Pampanostraat den besindario di e kas unda a bin haña Pastor sin señal di bida.

Segun testigunan a deklará, na momento ku Nathaniel Pastor tabata kanando ta yega kas di e barbero Shanio den Mari Pampun nan a nota e outo Hyundai Elantra manehá pa Lourens kore bin den direkshon di Pastor. Pastor a bini bèk for di un tienda ku e lo mester a bai kumpra vloei. Segun Ministerio Públiko, e testigu amigu di Pastor a tende Lourens puntr’é si “te ta Spock”. Aparentemente, nan sa yama Nathaniel “Spock” tambe. Segun e testigu, despues e la tende e tirunan kai.

HUES

Hues mr. Carmelia ayera a duna su sentensia den e kaso aki kaminda el a bisa ku tur e akusashon ta proba i a duna Edion Lourens di 24 aña un kastigu di prizon di 16 aña kual ta idéntiko na lokual ku Fiskal a pidi i ademas el a bai di akuerdo ku fiskal ku e akusado mester paga daño i perhuisio na famianan di 14.517,79.