WILLEMSTAD – Minister di Hustisia Shalten Hato djasabra último tabata presente na selebrashon di dia di bombero. Ta asina ku na aña 2008 Konseho Insular di Kòrsou a proklamá e djasabra rondó di 9 di òktober komo dia di Bombero. Durante e selebrashon, gobièrnu a sòru tambe pa e grupo di 25 aspirante pa bira miembro di kuerpo di bombero di Kòrsou risibí e dekreto pa nan kuminsá nan estudio na yanüari 2024.

Segun e Minister, pa engrandesé e kuerpo di bombero mester di invershon den kapital humano komo den material. Den kuadro di esaki resientemente el a nombra un komandante nobo pa guia i liderá e kuerpo di bombero. Jair Tromp a kuminsá traha ayera. E komandante nobo aki entre otro lo mester sòru pa implementashon di e plan pa fortifikashon di Brandweer yamá ‘Verstevigingsplan Brandweer’.

Hato: “Adishonalmente entrante yanuari 2024 lo inisiá ku un klas nobo di 25 aspirante pa fortifiká e kuerpo di bombero, ku den wikènt a haña un kopia di nan Landsbesluit (dekreto). Ku balentia, amor pa trabou, determinashon, perseveransia i dedikashon bomberonan ta ehersé nan tarea komo ‘Pagadó di Kandela’ tur dia di nobo.”

Segun Hato, hopi biaha hende ta supestimá i no ta mira e importansia di e trabou ku bomberonan ta hasi den general. “P’esei ta importante pa para ketu na e dia akí, pasó un bombero tur dia sagradamente ta sali su kas sin pensa tin biaha kuantu esfuerso òf sakrifisio e lo mester hasi e dia ei, ku e solo ophetivo pa salba abo, e òf ami su bida.

Pues un persona ku skohe pa ta un bombero ta skohe pa pone su bida na riesgo pa su komunidat i pa ta disponibel 24/7 pa yuda su próhimo.”

E minister a enfatisá durante e selebrashon ku ta p’esei ser un bombero, ta un funshon hopi noble ku bo mester hasi ku konvikshon i amor pa asina sirbi bo pais. “E peliger i retonan den bida di un bombero ta grandi. Komo titular di hustisia, palabra pa ekspresá gratitut na boso ta poko. Lokual sí ami komo titular di hustisia huntu ku Gabinete Pisas por hasi, ta invertí den e kuerpo di bombero di Kòrsou i tambe bini ku maneho pa elevá nivel i e kalidat di servisio ku e Kuerpo ta brinda na komunidat.”
Banda di habri vakatura pa 25 bombero reforsá kuerpo, gobièrnu ta preparando tambe pa kumpra diferente ekipo/material manera entre otro ‘warmtebeeldcamera’ (kámaranan termográfiko), vehíkulonan manera pikòp/bùs i ‘brandweerwagen’, iPads i muchu mas.

“Konhuntamente ku e tim di maneho mi lo keda monitoriá unda komo gobièrnu por aportá pa yuda fortifiká i engrandesé nos kuerpo di bombero, pa asina sigui alsa e kalidat di servisio ku ta brinda na komunidat. Mi ta kombensí ku kada un di boso tur dia ta duna tur lokual ta di boso parti i ta ehersé boso tarea ku hopi balentiá, amor, determinashon, perseveransia i dedikashon. Awe mi kier yama boso kada unu DANKI pa ta forma parti dje kuerpo di bombero, ku 365 dia pa aña i 24 ora pa dia t’ei kla prepará pa sirbí i tambe yuda prevení komunidat den kualkier situashon òf kalamidat.”