Akusado kondená pa morto den tráfiko mester sinta 1 aña den prizòn.

Kralendijk,– Korte penal na Boneiru a dikta ku un shofùr ku tabata manehá su vehíkulo intoksiká ta risibí un kastigu di 3 aña den prizòn. Komo ku e akusado no a hasi echo similar den pasado, e persona mester sinta solamente 1 aña dje kastigu, pero e dos otro añanan ta keda kondishonal.

Ta trata di un aksidente fatal ku a tuma lugá riba 25 di sèptèmber 2022 na Boneiru. Kuerpo polisial di Boneiru a risibí un notisikashon 6.47 or di mainta indikando ku un aksidente a tuma lugá kaminda un persona a keda ku leshon grave. Mas aleu, polisnan ku a yega na e sitio a nota ku na yegada ya kaba e víktima tabata tapá ku un laken blanku. Algun ratu despues e dòkter konserní a yega na e sitio i a dikta ku e víktima a fayesé debí na e aksidente ku e outo. E víktima lo tabata un persona ku tabata kore su baiskel den e área.

For di investigashon polisial a resultá ku tantu e víktima komo un otro persona ku tabata kore baiskel kun’é tabata na altura ku un vehíkulo tabata aserkando. Alabes e otro persona ku tabata kore baiskel a kai den un estado di shòk na momentu ku e vehíkulo a dal e víktima.

Durante tratamentu e hues den korte a dikta ku tin sufisiente informashon ku e shofùr tabata kore intoksiká. Alabes, fiskal a demandá un kastigu di 3 aña kaminda 1 aña ta keda kondishonal, pero korte a opta pa ekstendé e kastigu kondishonal na 2 aña, pues e akusado mester sinta su kastigu solamente 1 aña largu. Finalmente, korte a indiká ku e akusado mester paga 27 mil dòler na e partido perhudiká.