Nieuwe Haven,– Den korte ayera a presentá e hóben R.J.P. di 49 aña kende ta keda akusá ku dia 9 di febrüari akusado a maltratá su señora kasa J.E.P. ku un faha i a laga markanan atras riba kurpa di e víktima i a dal’e na diferente okashon ku e faha na su man robes i su man drechi lagando diferente plèk blou na kurpa kompleto di e dama.

Tambe riba e mesun fecha el a menasa e víktima ku e lo viol’é i tambe e lo mester a menasa e víktima ku e lo tir’é mata i ku e lo tin un arma di kandela. Hues ta splika e akusado ku su kasa, señora J.E.P. a duna keho riba e dos kosnan aki kual ta bini den e rapòrt. E akusado ta bisa ku e ta akseptá ku el a dal su kasa ku faha i ku e tin su malesa i no sa mes kiko pasa e dia ei, su wowonan a bira skur.

E ta bisa ku nan a bringa, pero e no a duna keho. Esei a sosodé dia 9 den oranan di mardugá. Hues ta bisa ku e no ta yama e lokual a sosodé un bringamentu. E tin pruebanan di dòkter ku e tambe a haña sla, pero e no a duna keho. E akusado ta splika ku tabatin diskushon i ora el a bai riba su kasa, esaki a dal’é ku un palu i mi a rabia kita mi faha kuminsá batié. Despues e ta bisa ku nan a papia bon bon, tur kos a keda normal i tabata te dia 16 di febrüari ku el a bai hasi denunsia.

E ta bisa ku e no ta kòrda mes kuantu biaha el a dal su kasa ku faha, pero sigur mas ku un biaha na su mannan. Hues ta bisa e akusado ku e señora a bai hasi denunsia e mesun dia i no 16 di febrüari den oranan di mainta, pero e akusado ta bisa ku dia 16 el a bai hasi keho riba un otro kos i nan a deten’é. E ta bisa ku e problema a kuminsá na momentu ku e kasa kier a sali i e no tabata kier pa el a bai. Ta trata di un pareha ku tin 6 aña kasa i mas ku 22 aña huntu. E víktima ta konta ku el a bai un entiero i a yega kas 8’or anochi, pero e akusado ta bisa ku no ta entiero el a bai, e víktima a keda ketu i kuminsá piki su kosnan pa bai for di kas. E víktima ta bisa ku e akusado a bai kue un faha i kuminsá batié kuné i ku e ta tir’é. Polis a bai na kas di e pareha i a buska e arma, pero no a bin enkontra ku nada di arma. E akusado ta bisa ku e no a papia nada di tira mata i tampoko di arma, e ta bisa ku e no tin niun arma. E ta bisa ku e no ta komprondé i ku e keho duna ta falsu.

E víktima ta bisa ku no ta promé biaha ku su kasa ta dal’e i a pidi polis pa tuma e kos na serio i ku e kier un prohibishon pa e akusado yega serka dje. Segun e akusado  den soño su kasa lo mester a menshoná nòmber di un hòmber i el a puntra su kasa ken esaki ta, pero e no kier a bisa. Na polis el a bisa ku e ta kere ku su kasa a bai duna keho, paso e kier a sigui ku su bida sin dje.

Fiskal

Fiskal a splika ku ta yamer ku den e kaso aki no tin un rapòrt di sikólogo i e ta kere ku ta bon pa esaki sirbi komo un atvertensia pa e akusado i ta hasi un demanda di 40 ora di trabou di kual 20 kondishonal i tambe un siman di prizon kondishonal

Hues

Hues ta bisa ku e ta dui akuerdo ku fiskal ku e echonan ta legalmente i konvinsentemente prueba mirando ku tambe por a mira e heridanan ku a keda atras. Pues echo ta ku dia 9 di febrüari el a dal si kasa diferente biaha ku faha. Hues ta bisa ku e echo ta grave, mirando ku ta su kasa i e echo a tuma lugá den kas kaminda tin un menor di edat ta biba ainda. Tambe e echo ku e señora tabata riba su kama den su kas.

Hues a bisa ku e ta preokupá tambe, puntrando su mes si realmente e akusado ta komprondé kon grave e kos ku el a hasi ta i kon ta bai prevení pa e no ripití algu asina. Hues ta bisa ku tin partinan positivo tambe manera entre otro ku e akusado mes ta pidi pa yudansa. Hues ta bisa ku mirando ku reclassering no a traha un rapòrt, e ta kere ku ta importante mirando e echo ku akusado no tin karchi di kastigu e tin ku wak kon pa mantené esaki asina.

Hues ta duna un kastigu kondishonal ku ta keda kologá mas largu riba su kabes, pues e no tin ku bai prizon awor aki. E ta duna e akusado 3 siman di kastigu kondishonal ku tempu di prueba di 3 aña. Tambe e akusado mester keda mèldu serka reclassering i mester sigui nan instrukshon.