Willemstad,– Representante di FMA a indiká ku nan ta satisfecho ku e enkuesta ku nan a tene último tempu. Ta asina ku alrederedor di 300 hóben a yena e enkuesta kual a duna FMA un bista realístiko tokante uso di supstansia bou di hubentut.

Pa medio di un enkuesta Fundashon pa Maneho di Adikshon(FMA) a trata na haña un mihó bista tokante uso di supstansia bou di hubentut. Ta asina ku e enkuesta a enfatisá tokante uso di droga i alkohól. E preguntanan tabata tokante uso di supstansia den e delaster 6 luna nan ku a tuma lugá.

FMA ta pendiente pa publiká e resultado di e enkuesta ainda, pero por nota ku e fundashon ta satisfecho mirando ku 300 hóben a yena e enkuesta. “Si nos a laga e enkuesta habrí mas largu, sigur mas hende lo a yena esaki”.

E enkuesta ku a dura 8 minüt pa yena tabata solamente pa hóben nan bou di 25 aña. E enkuesta a puntra entre otro e situashon personal di e hóben i tambe uso di supstanshanan ilegal manera uso di alkohòl, uso di sigaria, uso di sigaria elektróniko i uso di droganan manera XTC, mariwana i Base.

Tambe e enkuesta a puntra tokante kon e uso di e supstansha ta bai. Ta asina ku e enkuesta a puntra si e hóben tin su mes sigaria eletróniko i si e mayornan sa kue  hóben tin un sigaria elektróniko. Alabes, e enkuesta a puntra basá riba ki emoshon e hóben por usa e supstansha. Si ta basá riba rabia, hansha, kontentu ets.

E enkuesta ku ta konsistí di 26 diferente pregunta a puntra e hóben partisipante tambe ku si el a yega di risibí kuido profeshonal relashoná ku uso di supstansha. E pregunta ta puntra ku si un dòkter, spesialista òf prefeshonal a yega di duna konseho pa baha man na uso di supstanshanan ilegal. Riba e pregunta aki e partisipante dje enkuesta por a skohe riba Si òf No.

FMA a indiká ku den e siman aki nan lo publiká e resultadonan di e enkuesta aki.