DEN HAAG—Den disturbionan rondó di enkuentro ku komunidat eritreo den un sentro na Den Haag, 4 agente polisial a keda heridá.

Dos agente a keda heridá na nan man, un a kibra su djentenan i un otro a keda alkansa pa un vehikulo. No tin informashon di e gravedat di e heridanan. For di nada e koleganan a keda konfronta ku violensia severo ssegun komandante Vulpen. Ta di lamenta ku koleganan i otro funashonarionan ta keda konfronta ku violensia, esaki ta inaseptabel. Varios hende a keda detene. Polis ta buskando kontakto ku testigunan. Alkalde Van Zanen ta kondena e disturbionan den su siudat komo teribel i inaseptabel. Djis prome ku mei anochi el a informa ku OM a pidi asistensia di un team di investigashon pa persigui esnan kulpabel. Anteriormente e munisipio a informa di un enkuentro organisa pa eritreonan pro-gobiernu eritreo na Den Haag den sala Opera. Segun e sentro tabata trata di un fiesta di komienso di aña. Oponentenan di e regimen eritreo a yega na e sitio pa buska problema loke a kondusi na e disturbionan.

Koomen, un eks-politiko ku ta bosero di e komunidat eritreo na Hulanda, a bisa ku tabatin 500-600 hende ta selebra den e sentro. Segun Koomen e enkuentro no tabatin ningun laso politiko ni e bishitantenan no a bai pafo pa bai konfrontashon ku e oponentenan. Pa basta tempu tin tenshonnan bou di eritreonan durante enkuentronan, segun e alkalde. Posiblemente e ta referi na un pelea masal na Rijswijk den 2023. Pa e motibu aki a tuma medida den konsulta ku e sentro i organisado. Asina tabatin mas seguridat i polis a prepara ekstra unidatnan. Despues ku a drenta melding ku hobennan eritreo di e organisashon Brigade Nhamedu tabata nuska konfrontashon, a saka un orden di emergensia segun e alkalde. Tambe el a pidi pa usa awa pa plama esnan ku ta envolvi den disturbio. Brigade Nhamedu ta un grupo di oponentenan di e regimen eritreo. Ta  prinsipalmente hobennan eritreo ku ta biba pafo di Eritrea. Nan tabatin distrubionan na London, Suisa, Canada i Merka. Miembronan di e grupo di oposishon ta mira e enkuentronan kultural Ii fiestanan di eritreonan komo un manera pa apoya e regimen eritreo i ta hasi tur esfuerso pa strobe e enkuentronan.

Mas aleu Van Zanen a splika ku brantwer a keda strobe den nan trabounan pasobra tabatin entre otro outonan di polis i privá na kandela. E kandela a plama bai na e sala di enkuentro. Finalmente polis a logra trese trankilidat bek asina brantwer por a hasi su trabou. Tambe a regla transporte pa bishitantenan por yega nan kas trankil. Kuerpo polisial a diskribi e esenanan komo zona di guera. Minister Yesilgoz tambe a kondena e insidentenan komo kompletamente inaseptabel. E komportashon aki lo no keda sin konsekuensia segun e minister. El a gradisi polis, brantwer i personal di ambulans pa nan esfuersonan.