WILLEMSTAD – MFK ke deliberá ku Minister di Desaroyo Ekonómiko (MEO) Ruisandro Cijntje i tambe Minister di Desaroyo Sosial, Labor i Bienestar (SOAW) Ruthmilda Larmonie-Cijntje tokante e nesesidat básiko ‘awa’. Segun e frakshon alrededor di 4300 kas di famia no tin konekshon di awa. P’e motibu ei e Frakshon ke un Reunion Públiko tokante e tópiko akí.

Segun MFK, no ta un sekreto ku na e momentu akí tin un kantidat grandi di kasnan di famia sin konekshon di suministro di awa. “Sifranan ku Frakshon di MFK ta disponé di dje ta indiká ku tin un total di masoménos 4300 kas di famia sin konekshon di suministro di awa.” Ta trata akí di kasnan di famia di kua e mayoria tin un entrada mensual hopi abou.

“Frakshon di MFK ta hopi bon na altura di e situashon, den parti pa motibu ku mensualmente Frakshon di MFK ta den e barionan ku ta duna Frakshon di MFK un bon bista riba e kantidat di kasnan sin suministro di awa, pero alabes un bista riba e estado finansiero tambe di kada kas. Loke Frakshon di MFK por konkluí ta ku e situashon akí ta rekerí atenshon purá di Parlamento.”

Segun MFK, Parlamento a aprobá den presupuesto di 2024 un oumento pa e supsidio ku ministerio di SOAW ta duna pa entre otro suministro di awa. Den práktika e proseso pa risibí e supsidio akí ta kana slo, i banda di esaki e depósito ankrá den e maneho interno di Aqualectra N.V. pa konektá
kuenta será ta muchu altu. Esaki ta pone ku e kliente no por kumpli kuné.

“Na aña 1993, Nashonnan Uní a proklamá e fecha 22 mart komo dia mundial di awa i ta konsiderá ku awa ta un di e produktonan primordial i vital pa salú di hende, konsiderando ku masoménos 60% di kurpa humano ta konsistí di awa. Korte Hulandes tambe ta reafirmá esaki prohibiendo kompanianan di utilidat pa deskonektá suministro di awa na kasnan di famia ku menor di edat.”

Frakshon di MFK ta di opinion ku mester formulá un maneho basá riba e metanan di desaroyo sostenibel “SDG’s” ku ta tene kuenta ku estado sosial pero tambe salú di e siudadano. “Pa e motibunan akí, Frakshon di MFK den Parlamento ta haña ta hopi importante pa deliberá ku Minister Ruisandro Cijntje i Minister Ruthmilda Larmonie-Cecilia pa konhuntamente den union bin ku solushon struktural pa ku rekonekshon di awa pa kasnan di famia.” E karta ta firmá pa Juniël Carolina, Gilbert Doran, Maria Nita, David Seferina, Eduard Braam, Ramón Yung i Fergino Brownbill.