BANKO SENTRAL,– Durante un workshop di riesgo di klima na Panama, e presidente di Banko Sentral, Richard Doornbosch a tene un presentashon tokante e maneho di riesgonan di klima den e sektor finansiero na Kòrsou i Sint Maarten.

Ta asina ku for di e presentashon por dedusí ku aktualmente 46% di e institutonan finansiero na Kòrsou i Sint Maarten ya kaba ta analisando ki efekto kambio di klima tin riba nan proseso operashonal. Ta asina ku e institutonan a indiká ku òrkan, tormenta i inundashon ta e riesgonan ku ta wòrdu konsiderá komo mas pisá. Pero tambe e institutonan ta konsiderá sekura i oumento di nivel di awa tambe komo riesgonan realístiko.

Den e análisis di banko sentral, Doornbosch a splika ku kompanianan di seguro por sierto ta tratando na inkluí mitigashon dje riesgonan di kambio di klima den nan maneho. Sinembargo e presidente a agregá ku pronto nan lo sigui analisá mas detayá, kon e institutonan finansiero ta tratando na mitigá e riesgonan di klima den nan maneho. Ademas, a resultá ku e propiedatnan na Sint Maarten ta kore mas riesgo ku e propiedatnan na Kòrsou.

Un otro aspekto ku banko sentral a diskubrí ta ku 80% di kompanianan di seguro aktualmente a opta pa oumentá nan pólisa i hasi nan kondishon general di nan pólisanan mas estrikto. Tur esaki ta akshon nan tumá pa mihó preparashon pa e riesgo di kambio di klima.

Tambe banko sentral a puntra e kompanianan finansiero kua ròl banko sentral mester tin den e desaroyo diskushon nan relatá na kambio di klima. Doornbosch a splika ku ora a puntra kua ròlnan e institutonan ta mira pa banko sentral den mitigashon di riesgo di klima, e mayoria di respondentenan ta konvensí ku banko sentral mester desaroyá un sistema di supervishon i emití guianan tokante integrashon di maneho di riesgo di klima den e maneho di riesgo den e kompanianan.

Na di dos lugá, desaroyá tèst di strès di klima i desaroyá mekanismo di raportá na momentu e kompania ta eksponé na e riesgo. Finalmente e sistema di supervishon lo inkluí guianan i rekesitonan pa promové un data sèt kaminda por analisá e riesgonan di klima.