PUNDA,— Lo bira hopi difísil pa Kòrsou yega su Herd Immunity , programá na dòbel bakunashon pa 106 mil persona. Segun sifranan suministrá pa gobièrnu te ku ayera tabatin 80.407 registrá miéntras 77.205 a pasa nan promé bakuna i 32.401 persona ya ta kompletamente bakuna.
E sifranan aki ta nifiká ku ainda Kòrsou no a logra yega 106 mil persona dòbel bakuna i ta nifiká ku pa awor aki no ta bai yega e Herd Immunity. Pero e proseso pa sigui bakuna ta sigui, esaki ta lokual dr. Jerry Semper a duna di konosé ayera na Vigilante. Pa lokual ta trata e sifranan marginá, esta oumento diario di registrashon, promé i di dos bakuna, tampoko no tabatin oumentonan drástiko, konfirmando ku e 106 mil persona lo ta difísil pa alkansá. Entre 2 pa 9 di mei un kantidat total di 3.227 persona a registrá pa tuma bakuna, lokual ta un promedio di 403 persona pa dia. Si sigui riba e trènt aki, lo tuma 63 dia pa yega na un registrashon di 106 mil persona, esei ta esnan kende a risibi nan promé bakunashon. Ta papiando di entre 2 pa 3 luna mas. Pa lokual ta trata e promé bakuna, un kantidat di 4.980 persona a tuma nan promé entre 2 pa 9 di mei último. Esaki ta un promedio di 623 persona diario. Falta ainda 28.795 persona mas pa pasa nan promé bakuna. Aki 46 dia, si sigui riba mesun trènt, 106 mil persona lo pasa nan promé bakuna.
Pa lokual ta trata e di dos bakuna, un promedio 1.100 persona ta bakunando diariamente. Na e momentonan aki tin 32 mil persona ku a bakuna 2 biaha. Falta alrededor di 74 mil persona ainda pa pasa nan di dos bakuna. No ta konosí ainda kuantu porsentahe di esnan kende a bakuna promé biaha tambe lo bai e di dos biaha. En lo general si e trentnan sigui riba mesun liña i si esnan kende no ke bakuna kambia di opinion, por spera ku aki 3 pa 4 luna Kòrsou por ta yega su Herd Immunity. Pero, mirando e bahada den e sifranan di registrashon i bakunashon, lo bai deeskala i pone ménos punto di bakunashon. E proseso di bakunashon lo bira unu regular i sentralisá. Kestion ta bira kon lihé e sifranan lo sigui baha.