Parlamentario Calmes a trese e proposishon pa tradusí nos leinan na papiamentu.

Willemstad- Durante di reunion di Parlamento, Parlamentario Rennox Calmes a bini ku e proposishon pa agregá 15 mil florin den e presupuesto pa e pòst di ‘vertaling en vertalking’. Pa medio di un moshon Parlamento a bai di akuerdo pa pone 30 mil florin den e presupuesto ku ta ser kita for di restante di otro pòstnan pa por pone den e pòst di ‘vertaling pa vertalking’.

Segun Parlamentario Rennox Calmes hopi biaha e idioma ta un barera pa nos hendenan komprondé nos leinan. Pero mester hasi algu pa kambia esaki. Esei ta nifiká ku frakshon di Trabou pa Kòrsou ta pidi pa riba e pòst di ‘vertaling en vertalking’ por subi esaki ku 15 mil florin. E intenshon ta pa traha riba e tradukshon di e leinan ku Parlamento ta bai traha riba dje aktualmente. Di e forma aki sigur 2 luna despues ku nan wòrdu publiká nan por ta na Papiamentu.

Parlamentario Calmes ta bisa di ta konvensí ku di e forma aki ta mustra emansipashon di un pueblo i mehorashon di komunikashon. Di e forma aki tambe ta eliminá barera di idioma i hende ta haña mas balor. Tambe esaki ta duna e idioma kaminda pa krese i desaroyá.

Parlamentario Ana Maria Pauletta di e frakshon di Partido PAR a splika ku e no ta komprondé unda Parlamentario Calmes a yega na 15 mil florin pa e parti di vertaling en vertalkingen i ku esaki no ta e manera korekto pa atendé ku e presupuesto dor di tira sifra. E ta splika ku esaki no ta desbaratá e proposishon pa tradusí leinan pero e no ta kere ku ta e forma mas responsabel pa atendé ku e presupuesto i lo por bai di akuerdo ku e proposishon di òrdu.

Tambe a hasi entrega di 3 moshon. Esakinan ta enserá e oumento di kolaboradornan pa Parlamentarionan, e tradukshon di leinan na Papiamentu i subi e pòst di ‘vertaling en vertalking’ ku 30 mil florin i a pidi pa duna Parlamento bèk su 21 mion den e presupuesto manera e tabata den 2019.